काठमाडौं । गत आर्थिक वर्षको असार मसान्तसम्म वाणिज्य बैंकहरुले ४२ खर्ब १ अर्ब ३९ करोड रुपैयाँ निक्षेप संकलन गर्दा ३७ खर्ब २० अर्ब ७५ करोड रुपैयाँ कर्जा लगानी गरेका छन् ।
बैंकर्स संघका अनुसार असार अन्तिम साता नै बैंकहरुले कर्जा लगानीको तुलनामा निक्षेप संकलन निकै बढाएका छन् । एक साताको अवधिमा बैंकको निक्षेप संकलन ८२ अर्बले बढ्दा कर्जा लगानी ४२ अर्ब रुपैयाँले बढेको छ ।
कोरोना महामारीको समयमा बैंकका कर्जाको माग कम देखिएको छ । साथै असार अन्तिम साता क्लोजिङको समय भएका कारण पनि कर्जाको माग कम भएको र निक्षेप बढेको तथ्याङकले देखाएको छ ।
यो अवधिमा सबैभन्दा बढी निक्षेप संकलन गर्नेमा एनआईसी एसिया बैंक रहेको छ । बैंकले ३ खर्ब २५ करोड रुपैयाँ निक्षेप संकलन गरेको छ ।
एनआईसी एसियापछि ग्लोबल आईएमई बैंक रहेको छ । बैंकले २ खर्ब ८३ अर्ब ३४ करोड, राष्ट्रिय वाणिज्य बैंकले २ खर्ब ६४ अर्ब १० करोड नबिल बैंक २ खर्ब २८ अर्ब १ करोड रुपैयाँ निक्षेप संकलन गरेका छन् । सबैभन्दा कम निक्षेप संकलन गर्नेमा नेपाल बंगलादेश बैंक रहेको छ । बैंकले ८९ अर्ब ३८ करोड रुपैयाँ निक्षेप संकलन गरेको छ ।
संघका अनुसार गत आवको अन्तिमसम्ममा बैंकिङ क्षेत्राबट ३७ खर्ब २० अर्ब ७५ करोड रुपैयाँ कर्जा लगानी भएको छ । जसमा सबैभन्दा बढी कर्जा लगानीगर्नेमा एनआईसी एसिया बैंक रहेको छ । बैंकले उक्त अवधिमा २ खर्ब ६४ अर्ब ८४ करोड रुपैयाँ लगानी गरेको छ । दोस्रोमा ग्लोबल आईएमई बैंक रहेको छ । बैंकले २ खर्ब ४२ अर्ब ५० करोड रुपैयाँ लगानी गरेको छ । २ खर्ब भन्दा बढी कर्जा लगानी गर्ने अन्य बैंकमा नबिल बैंकले २ खर्ब ५ अर्ब ६५ करोड रुपैयाँ लगानी गरेका छन् ।
राष्ट्र बैंकले गत आर्थिक वर्ष २०७७-०७८ को मौद्रिक नीतिमा बैंक तथा वित्तीय संस्थाको कर्जा स्रोत परिचालन अनुपात (सिसिडी रेसियो) ८५ प्रतिशत कायम गरिएको थियो । कोभिड-१९ संक्रमणका कारण प्रभावित अर्थतन्त्र पुनरुत्थान गर्न बैंक तथा वित्तीय संस्थाहरुको साधन प्रवाह अभिवृद्धि गर्न सिसिडी रेसियोको सीमा २०७८ असार मसान्तसम्मको लागि ८० प्रतिशतबाट बढाई ८५ प्रतिशत कायम गरिएको थियो । संघका अनुसार यो अवधिमा सिसीडी रेसियो ७७.३ प्रतिशत रहेको छ ।
संघका अनुसार सबैभन्दा बढी मेगा बैंकको रहेको छ । बैंकको ८२.०२ प्रतिशत रहेको छ । मेगापछि एनआईसी एसिया बैंकको ८१.१२ प्रतिशत, कुमारी बैंकको ८१.०१ प्रतिशत रहेको छ । यस्तै सबैभन्दा कम सिसिडी रेसियो रहेका बैंकमा नेपाल बंगलादेश बैंकको ६७.३७ प्रतिशत, राष्ट्रिय वाणिज्य बैंकको ६९.७४ प्रतिशत, एभरेष्ट बैंकको ७२.६२ प्रतिशत रहेको छ ।
वि.सं.२०७८ साउन ४ सोमवार १७:१९ मा प्रकाशित
