काठमाडौं । बौद्ध धर्मको प्राचिन पुरातात्विक बहुमूल्य ग्रन्ध हो भन्दै नगद ठगी गरेको अभियोगमा प्रहरीले २ जनालाई पक्राउ गरेको छ ।
प्रहरीले २ जनालाई काठमाडौं महानगरपालिका–२२ न्यूरोडबाट पक्राउ गरेको जनाएको छ । पक्राउ पर्नेहरुमा काठमाडौं महानगरपालिका-३० मैतीदेवी बस्ने सप्तरी राजविराज नगरपालिका-३ घर भएका ४७ वर्षीय प्रशान्त प्रताप सिंह र काठमाडौं महानगरपालिका-८ मृगस्थली बस्ने दाङ शान्तिनगर गाउँपालिका–४ घर भएका ६५ वर्षीय छन्त्याल भन्ने पूर्ण बहादुर मगर रहेका छन् ।
उनीहरुले २ जना पीडितलाई ४ करोड पर्ने पुरातात्त्विक महत्त्वको धार्मिक पुस्तक खरिद गर्न लागेकोमा पैसा नपुगेकोले पुस्तक विश्वासका लागि बन्धकी स्वरुप राखी केही रकम दिनुहोस भनी पीडितसँग नगद १५ लाख ५ हजार रुपैयाँ ठगी गरेको भन्ने जाहेरीको आधारमा महानगरीय अपराध महाशाखा मिनभवनबाट खटिएको प्रहरीले ठगी कार्यमा संलग्न उनीहरुलाई पक्राउ गरेको हो ।
उनीहरुलाई थप अनुसन्धान तथा कारवाहीको लागि महानगरीय प्रहरी परिसर टेकु काठमाडौं पठाइएको महाशाखाले जनाएको छ ।
वि.सं.२०७८ साउन १५ शुक्रवार १४:१२ मा प्रकाशित