काठमाडौं । विश्वभर फैलिएको कोरोना महामारीको असर नेपालमा पनि परेको छ । जसका कारण गत आर्थिक वर्षमा नेपालमा फेससिल्ड र स्यानिटाइजरको आयात निकै बढेको छ ।
भन्सार विभागका अनुसार गत आर्थिक वर्षमा नेपालमा १ अर्ब ७ करोड ७० लाख ८४ हजार रुपैयाँको फेससिल्ड र स्यानिटाइजर आयात भएको छ । विभागका अनुसार १ वर्षको अवधिमा ६५ करोड १३ लाख ४९ हजार रुपैयाँको स्यानिटाइजर र ४२ करोड ५७ लाख ३५ हजार रुपैयाँको फेससिल्ड आयात भएको छ ।
फेससिल्ड र स्यानिटाइजर आयात हुँदा राज्यले १४ करोड ८९ लाख ६ हजार रुपैयाँ राजस्व पाएको छ । जसमा ठूलो हिस्सा स्यानिटाइजरको रहेको छ । गत आर्थिक वर्षमा स्यानिटाइजर आयात गर्दा राज्यले १२ करोड ३८ लाख ३१ हजार रुपैयाँ राजस्व लिएको छ भने फेससिल्ड आयातबाट २ करोड ५० लाख ७५ हजार रुपैयाँ मात्रै राजस्व पाएको छ ।
विभागका अनुसार १५ वटा देशबाट २० लाख ९६ हजार ७२ किलो स्यानिटाइजर आयात भएकोमा सबैभन्दा बढी भारतबाट आयात भएको छ । एक आर्थिक वर्षको अवधिमा भारतबाट मात्रै ४९ करोड १४ लाख ८२ हजार रुपैयाँको स्यानिटाइजर आयात भएको छ । नेपालमा बढी स्यानिटाइज आउने देशमा चीन दोस्रो स्थानमा रहेको छ । चीनबाट १२ करोड ७ लाख ५३ हजार रुपैयाँको स्यानिटाइरज आयात भएको छ ।
यस्तै बंगलादेश, कोरिया, मलेसिया, भियतनाम, यूनाइटेड अरब इमिरेट्स, बंगलादेश, इटाली लगायतका देशबाट आयात भएको छ ।
यस्तै यो अवधिमा ४२ करोड ३४ लाख ४१ हजार रुपैयाँ ८५ लाख ८५ हजार १०६ पिस फेससिल्ड आयात भएको छ ।
नेपालमा फेससिल्ड बढी भारत, चीनबाट आायात हुने गरेको छ । त्यस्तै आयरल्याण्ड, डेनमार्क, जापान, यूएई, थाइल्याण्ड, अमेरिका लगायतका देशबाट आयात भएको छ ।
वि.सं.२०७८ साउन १९ मंगलवार १२:३६ मा प्रकाशित
