काठमाडौं । अर्थ मन्त्रालयले नेपाल स्टक एक्सचेञ्ज (नेप्से) लाई सर्वोत्तम सिमेन्ट उद्योगले गरेको ओटिसी कारोबारको विवरण माग गरेको छ ।
अर्थ मन्त्रालयले नेप्सेलाई एक पत्र लेख्दै तीन दिन भित्र ओटिसिको कारोबारको सम्पूर्ण विवरण माग गरेको छ । मन्त्रालयले नेप्सेलाई लेखेको पत्रमा सिमेन्टले नेप्सेमा गरेको ओटिसी कारोबारका लागि कहिले निवेदन पेश गरेको, त्यस सम्बन्धमा नेप्सेबाट कहिले ओटिसी कारोबारका लागि स्वीकृति दिएको हो ? तीन दिन भित्र जानकारी गराउन भनेको छ ।
मन्त्रालयले नेप्सेलाई उक्त सेयर खरिद बिक्रीको विस्तृत विवरण स्पष्ट रुपमा खुलाई पत्र प्राप्त भएको तीन दिन भित्र वित्तीय क्षेत्र व्यवस्थापन तथा संस्था समन्वय महाशाखामा पठाउन भनेको छ । ्धितोपत्र बोर्डका अध्यक्ष भिष्मराज ढुंगानाले पदिय मर्यादा बाहिर गएर छोरीको नाममा र नेप्सेका सिइओ चन्द्र सिंह साउदले श्रीमतिको नाममा सर्वोत्तम सिमेन्टको सेयर किनेका थिए । सर्वसाधारणलाई ७५० मा बिक्री गर्न तयार रहेको सेयर उनीहरुलाई २५० मा नै बिक्री गरिएको थियो ।
बुक बिल्डिङ विधिबाट आइपीओ निष्काशन गर्न लागेको कम्पनीको सेयर बजारमा आउनु भन्दा पहिला नै ओटिसी बजारबाट मिलेमतोका आधारमा कारोबार भएपनि मन्त्रालयले निकै चासो दिएको छ । यसअघि मन्त्रालयले बोर्डका अध्यक्ष र नेप्सेका सिइओलाई नै स्पष्टीकरण सोधिसकेको छ । दुवै जनाले जवाफ समेत पठाइसकेका छन् । पछिल्लो समयमा भ्रष्टाचारमा लिप्स बनेका बोर्डका अध्यक्षले त जागिर नै जाने भएपनि मन्त्रीको निकै चाकडी गरेर जवाफ पठाएका छन् ।
वि.सं.२०७८ साउन २२ शुक्रवार १४:५६ मा प्रकाशित