काठमाडौं । विश्व स्वास्थ्य संगठनको नेपालस्थित कार्यलयले कोभिड-१९ प्रतिकार्यलाई सुदृढ बनाउन १८ लाख अमेरिकी डलर बराबरको अत्यावश्यक औषधी र स्वास्थ्य सामग्री सरकारलाई हस्तारन्तरण गरेको छ ।
संगठनले स्वास्थ्य तथा जनसंख्या मन्त्रालय मार्फत शुक्रराज ट्रपिकल तथा सरुवा रोग असपताल टेकुमा २ लाख ५० हजार एम्पल्स डेक्सामेथाजोन, २ हजार अक्सिजन कन्सनट्रेटरहरु, २४ हजार वटा भेन्चुरी मास्क, करिब ५ लाख अक्सिजन नसल क्यानुला, ६ लाख मास्क र ५ लाख सर्जिकल ग्लब्स सहितका सामग्रीहरु हस्तान्तरण गरेको छ ।
विश्व स्वास्थ्य संगठन नेपालस्थित कार्यलयका प्रमुख डाक्टर राजेश संभाजीराव पाण्डवले देशमा संक्रमितहरुको संख्या र अस्पतालमा भर्नाहुने बिरामीहरुको संख्या बढेको अवस्थामा अत्यावश्यक स्वास्थ्य सामग्रीहरु सहयोग गरेको बताए ।
विश्व स्वास्थ्य संगठनबाट सहयोग स्वरुप प्रदान गरिएका २ हजार अक्सिजन कन्सनट्रेटरहरु आवश्यक स्वास्थ्य सामग्रीहरुको अभाव हुन नदिन सहयोगी बन्नेछन् । श्वासप्रश्वासमा कठिनाई भएका वा अक्सिजनको मात्रा एकदमै कम भएका बिरामीहरुलाई आवश्यक मात्रामा अक्सिजन पुर्याउन अक्सिजन कन्सेनट्रेरहरु प्रयोग गरिन्छ । अक्सिजन कन्सनट्रेटर र डेक्सामेथाजोन दुबैले हजारौँ मानिसहरुको जीवन बचाउन सकिने अपेक्षा गरिएको छ ।
‘अत्यवस्यक स्वास्थ्य सामग्रीहरु प्रदान गर्नुभएकोमा नेपाल सरकारको तर्फबाट म विश्व स्वास्थ्य संगठनलाई धन्यवाद दिन चाहान्छु । महामारीको शुरुवातदेखी नै विश्व स्वास्थ्य संगठनले नेपाललाई कोभिड–१९ प्रतिकार्यमा बिभिन्न खालको सहयोग प्रदान गर्दैआइरहेको छ ।
आज प्राप्त भएको यति धेरै अक्सिजन कन्सेनट्रेरहरु र अन्य मेडिकल सामग्रीहरुले हाम्रो कोभिड–१९ प्रतिकार्यलाई सुदृढ बनाउन आवश्यक श्रोतसाधनको परिपूर्ती गर्न महत्तवपूर्ण भूमिका खेल्नेछन् । अब यी सामग्रीहरुको आवश्यकता भएका देशभरिका दुरदराज गाउँठाउँमा पुर्याउन मन्त्रालयले काम थाल्नेछ ।’ माननीय स्वास्थ्य राज्यमन्त्री उमेश श्रेष्ठले भन्नुभयो ।
स्वास्थ्य तथा जनसंख्या मन्त्रालयले तयार पारेको वितरण योजना अनुसार स्वास्थ्य समग्रीहरु नेपालभरिका सातै प्रादेशिक स्वास्थ्य आपूर्ती व्यवस्थापन शाखा र २८ वटा अस्पतालहरुमा वितरण गरिनेछ। स्वास्थ्य तथा जनसंख्या मन्त्रालयले सबै प्रदेशमा सामग्रीहरु ढुवानी गर्न यसै साता भित्र सुरु गर्ने लक्ष लिएको छ ।
वि.सं.२०७८ साउन २६ मंगलवार ११:०८ मा प्रकाशित