काठमाडौं । महालेखापरीक्षकको कार्यालयले कम कर दाखिला गर्ने ७ हवाई कम्पनीलाई छानबिनका लागि निर्देशन दिएको छ ।
आर्थिक वर्ष २०७५/७६ मा नेपालबाट उडान भर्दा कम कर दाखिला गरेको पाईएकाले करिब ५२ करोड असुल तथा छानबिन गर्नका लागि सरकारलाई निर्देशन दिएको हो ।
आन्तरिक राजश्व कार्यालय पुतलीसडकमा दर्ता रहेका ५, नयाँ बानेश्वरको १ र टंगालको १ हवाई कम्पनीले घटी कर दाखिला गरेको कार्यालय जनाएको छ । ती कम्पनीहरुबाट ५१ करोड ९८ लाख ८९ हजार रुपैयाँ र त्यसामा लाग्ने शुल्क तथा ब्याज असुली गर्न निर्देशन दिएको हो ।
आयकर ऐन, २०५८ को दफा ७० अनुसार नेपालबाट प्रस्थान हुने यात्रुको ओसारपसार गर्दा ५ प्रतिशत र नेपालबाट अर्को विदेशी मुलुकमा पुग्ने गरि प्रस्थान नहुने हवाई यातायातमा २ प्रतिशतका दरले कर लाग्ने व्यवस्था छ ।
उक्त व्यवस्था अनुसार उडान भर्ने एअरलाइन्सको टिकट जुनसुकै देशबाट जाजरी भएपनि नेपालबाट प्रस्थान हुने यात्रुको आधारमा हवाई सेवामा कर लाग्ने देखिन्छ ।
वि.सं.२०७८ भदौ ४ शुक्रवार १७:५९ मा प्रकाशित