काठमाडौं । सेयर लगानीकर्ताले आज (बुधबार) माइतिघर मण्डलामा एक घन्टा रिले अनसन बसेका छन् । पुँजी बजार सुधार सङ्घर्ष समितीले माइतीघरमा ४ देखी ५ बजेसम्म रिले अनसन गरेको हो ।
सेयर लगानीकर्ता दिपेन्द्र अग्रवालले नेतृत्व गरेको रिले अनसन दैनिक १ घन्टाको दरले भदौ २९ गतेसम्म रहने छ । अग्रवालका अनुसार पहिलो चरणमा भदौ २९ गतेसम्म आजबाट रिले अनसन सुरु भएको हो ।
रिले अनसनको क्रममा लगानीकर्ताले गभर्नर महाप्रसाद अधिकारीको राजीनामा माग्दै १२० दिनको औसत मूल्य कायम गर, ४ करोड र १२ करोडको सिमा तत्काल खारेज गर, सेयर बजार जुवाघर नभएर जिविका हो, बैंकका सहायक कम्पनीलाई ब्रोकर लाईसेन्स दे जस्ता नारा लेखिएको प्ले कार्ड लिएर रिले अनसनमा उत्रिएका छन् ।
लगानीकर्ता संघर्ष समितिले राष्ट्र बैंक समक्ष बुझाएका १८ बुँदे माग पुरा नगरेको खण्डमा २९ गतेपछि आमरण अनसन बस्ने तयारीमा संघर्ष समिति रहेको छ । त्यसको लागि भने स्थान तय भएको छैन । समितिले सोमबार नेपाल राष्ट्र बैंकका प्रवक्ता देव कुमार ढकाललाई १८ बुँदे मागसहितको ज्ञापनपत्र बुझाएको छ ।
राष्ट्र बैंकले मौद्रिक नीतिमार्फत एक बैंक तथा वित्तीय संस्थाबाट ४ करोड रुपैयाँ र एक व्यक्तिले बढीमा १२ करोड रुपैयाँमात्रै सेयर धितोमा कर्जा लिन पाउने गरेको व्यवस्था गरेको छ । राष्ट्र बैंकले मौद्रिक नीति आएको तीन महिना नभइ आफ्नो निर्देशन परिवर्तन नहुने दाबी गर्दै आएको छ । यसले गर्दा लगानीकर्ताको माग पुरा हुने वा नहुनेमा भने अन्योल नै रहेको छ ।
वि.सं.२०७८ भदौ २३ बुधवार १६:५३ मा प्रकाशित
