काठमाडौं । अमेरिकी सहयोग नियोग मिलेनियम च्यालेन्ज कर्पोरेसन (एमसीसी) की उपाध्यक्ष फतिमा सुमार चार दिने भ्रमणको लागि नेपाल आएकी छिन् ।
सुमारसँगै नायव उपाध्यक्ष जोनाथन ब्रुक्स पनि नेपाल आएका छन् । दुवै जना बिहीबार बिहान काठमाडौं आएका हुन् । आज उपत्यकाको अधिकांश स्थानको सुरक्षा व्यवस्था निकै कडा पारिएको बताइएको छ ।
नेपालमा एमसीसीको तिब्र विरोध भइरहेको समयमा सुमार नेपाल आएकी छिन् । चार दिने नेपाल भ्रमणको क्रममा उनले प्रधानमन्त्री शेरबहादुर देउवा, नेकपा एमालेका अध्यक्ष तथा पूर्व प्रधानमन्त्री केपी शर्मा ओली, माओवादी अध्यक्ष पुष्प कमल दाहाल लगायतका नेताहरुसँग भेटने र एमसीसीको विषयमा आवश्यक छलफल गर्ने बताइएको छ ।
स्रोतका अनुसार प्रधानमन्त्री देउवासँग भने शुक्रबार भेटने कार्यसूची रहेको छ । नेपालमा एमसीसीको तिब्र विरोध भइरहेको समयमा उनको नेपाल भ्रमणलाई तिब्र चासोका साथ हेरिएको छ । उनको भ्रमणले नेपालमा एमसीसी पारित गर्न प्रमुख राजनीतिक दलका नेताहरुलाई तिब्र दबाब हुने आंकलन पनि गरिएको छ ।
एमसीसी मार्फत नेपालमा करिब ५५ अर्ब रुपैयाँको सहयोग आउने भनिएको छ । उक्त सहयोग रकम विद्युतीय प्रसारण लाइन निर्माण र सडक पूर्वाधार निर्माणमा खर्च हुने छ । नेपालमा एमसीसी कार्यान्वयनका लागि संसदबाट पास हुनुपर्छ । अहिले सांसदहरु नै यसको पक्ष र विपक्षमा देखिएका छन् ।
वि.सं.२०७८ भदौ २४ बिहीवार ११:०२ मा प्रकाशित
