काठमाडौं । चालु आर्थिक वर्ष २०७८/७९ को दोस्रो महिनासम्म करिब ३६ करोड बराबरको लसुन, प्याज र अदुवा आयात भएको छ ।
भन्सार विभागका अनुसार चालु आवको भदौ महिनासम्म ३५ करोड ९० लाख ३ हजार रुपैयाँ बराबरको अदुवा, लसुन र प्याज आयात भएको हो ।
नेपालमा छिमेकी दुई मुलुक भारत र चीनबाट सबैभन्दा बढी लसुन, प्याज र अदुवा आयात हुने गरेको विभागले जनाएको छ ।
भदौ महिनासम्म ती मुलुकहरुबाट ६ हजार २७२ टन बढी लसुन, प्याज र अदुवा आयात भएको हो ।
विभागका अनुसार उक्त अवधिमा १३ करोड २८ लाख ९६ हजार रुपैयाँ बराबरको ताजा लसुन नेपाल भित्रिएको छ ।
नेपाल बजारमा चिनियाँ लसुनको बर्चस्व देखिएको छ । उक्त देशबाट १३ करोड २७ लाख ४२ हजार रुपैयाँ बराबरको लसुन नेपाल आएको हो । भारतबाट भने १ लाख ५३ हजार रुपैयाँ मात्रैको लसुन आयात भएको विभागले जनाएको छ ।
चालु आवको दोस्रो महिनासम्ममा १९ करोड ४१ लाख २२ हजार रुपैयाँ बराबरको प्याज आयात भएको विभागको तथ्याङ्कमा उल्लेख छ । नेपाली बजारमा भारतीय प्याज बढी आयात हुने गरेको छ ।
उक्त अवधिमा भारतबाट १८ लाख ६६ लाख १८ हजार रुपैयाँ बराबरको प्याज आयात भएको हो । चीनबाट भने ७५ लाख ३ हजार रुपैयाँ बराबरको प्याज नेपाल भित्रिएको छ । विभागका अनुसार ती दुई मुलकुबाट ४ हजार ९४९ टन प्याज आयात भएको देखिएको छ ।
यस्तै, चालु आवको भदौ महिनासम्ममा ३ करोड १९ लाख ८५ हजार रुपैयाँ बराबरको अदुवा आयात भएको विभागले जनाएको छ ।
विभागका अनुसार उक्त अवधिमा भारत र चीनबाट १४३ टन ताजा अदुवा नेपाल भित्रिएको हो । नेपाली बजारमा भारतीय अदुवा बढी आयात हुने गरेको छ ।
उक्त अवधिमा भारतबाट मात्रै ३ करोड १९ लाख २४ हजार रुपैयाँ बराबरको अदुवा आयात भएको हो । चीनबाट भने ६१ हजार रुपैयाँ बराबरको ६९७ केजी अदुवा आयात भएको विभागले जनाएको छ ।
वि.सं.२०७८ असोज ११ सोमवार १५:०७ मा प्रकाशित
