बसन्त रुपाखेती
काठमाडौं । चालु आर्थिक वर्ष २०७८/७९ असोज मसान्तसम्म २ अर्ब बढीको स्याउ आयात भएको छ ।
भन्सार विभागले हालै सार्वजनिक गरेको तथ्याङ्क अनुसार असोज मसान्तसम्म २ अर्ब ६ करोड ५९ लाख ६१ हजार रुपैयाँ बराबरको स्याउ आयात भएको हो ।
चालु आवको भदौ मसान्त र असोज मसान्त (एक महिना)मा स्याउ आयात ६१.४३ प्रतिशत बढेको छ । नेपालमा नै उत्पादन भएको स्याउको ढुवानी र बजार सुनिश्चित हुन नसक्दा आयात वृद्धि भएको हो ।
नेपालमा छिमेकी दुई मुलुक भारत र चीन, टर्की र गिनी बिसाउ देशबाट स्याउ आयात हुने गरेको विभागले जनाएको छ । नेपाली अर्गानिक स्याउको ब्राण्डिङको अभावमा विदेशी स्याउ आयात बढेको बताइएको छ ।
असोज मसान्तसम्म नेपाल २६ हजार ६४२ टन बढी स्याउ आयात भएको विभागले जनाएको छ । स्याउ आयातबाट सरकारले १९ करोड ६४ लाख ८० हजार रुपैयाँ राजस्व प्राप्त गरेको छ ।
चालु आवको तीन महिनमा सबैभन्दा बढी स्याउ चीनबाट आयात भएको छ । उक्त देशबाट असोज मसान्तसम्म १ अर्ब ३० करोड ९४ लाख ८५ हजार रुपैयाँ बराबरको स्याउ आयात भएको हो । चीनबाट १५ हजार २६६ टन स्याउ नेपाल भित्रिएको हो ।
विभागका अनुसार असोज मसान्तसम्म भारतबाट ७५ करोड ३६ लाख ९० हजार रुपैयाँ बराबरको ११ हजार ३३१ टन बढी स्याउ आयात भएको हो ।
यस्तै, उक्त अवधिमा टर्कीबाट २६ लाख २५ हजार रुपैयाँ बराबरको ४१ हजार ७६० केजी र गिनी विसाउबाट १ लाख ६१ हजार रुपैयाँ बराबरको ताजा स्याउ आयात भएको छ ।
नेपालमा उत्पादन हुने गरेको स्याउनको राम्रो ग्रेडिङ हुन नसक्नु र ढुवानीमा हुने कठिनाइका कारण पनि नेपाली उत्पादनले बजार नपाउने, किसानको लगानी नउठ्ने तर आयात भने प्रशस्त हुने गरेको छ ।
नेपालमै उत्पादित स्याउको बजार व्यवस्थापनमा ध्यान दिन सकेमा स्वदेशमै रोजगारी सृजना, आयआर्जन वृद्धि र आयात प्रतिस्थापन गर्न सकिने जानकारहरुको भनाई छ ।
यसले अर्थतन्त्रमा समेत धेरै ठेवा पुग्ने देखिन्छ । नेपाली उत्पादनलाई पूर्ण प्रयोगमा ल्याउन नसक्दा स्याउ आयातकै नाममा नेपालबाट वर्षेनी अर्बौ रकम विदेशीने गरेको छ । नेपालमा मुस्ताङ, जुम्ला लगायतका जिल्लामा स्याउ उत्पादन हुने गरेको छ ।
वि.सं.२०७८ कात्तिक १२ शुक्रवार १७:२७ मा प्रकाशित
