काठमाडौं । महुली लघुवित्त वित्तीय संस्थाले चालु आर्थिक वर्ष २०७८/७९ को पहिलो त्रैमासमा २ करोड बढी नाफा कमाएको छ ।
बुधवार कम्पनीले सार्वजनिक गरेको चालु आवको असोज मसान्तसम्मको वित्तीय विवरणले यस्तो देखाएको हो । उक्त अवधिमा कम्पनीले २ करोड ३२ लाख ५६ हजार रुपैयाँ नाफा कमाएको छ ।
जुन गत वर्षको असोज मसान्तको तुलनामा १२०.४९ प्रतिशतले बढी हो । गत वर्षको सोही अवधिमा कम्पनीले १ करोड ५ लाख ४७ हजार रुपैयाँ नाफा कमाएको थियो ।
उक्त अवधिमा कम्पनीको खुद ब्याज आम्दानी ७ करोड ६ लाख ६१ हजार रुपैयाँ रहेको छ । गत वर्षको असोज मसान्तसम्मको तुलनमा भने खुद ब्याज आम्दानी ५६.०९ प्रतिशतले बढेको हो ।
गत वर्षको सोही अवधिमा कम्पनीको खुद ब्याज आम्दानी ४ करोड ५२ लाख ६७ हजार रुपैयाँ रहेको थियो ।
कम्पनीको चुक्ता पुँजी २८ करोड २१ लाख ६९ हजार रुपैयाँ रहेको छ । कम्पनीले जगेडा तथा कोषमा भने २१ करोड २६ लाख ३९ हजार रुपैयाँ राखेको छ ।
गत वर्षको सोही अवधिमा तुलनमा कम्पनीको खराब कर्जामा झिनो वृद्धि देखिएको छ । गत वर्षको असोज मसान्तसम्म २.४१ प्रतिशत रहेको खराब कर्जा यस वर्षको सोही अवधिमा २.४२ प्रतिशत पुगेको छ ।
कम्पनीको प्रतिसेयर आम्दानी ४१ रुपैयाँ ५४ पैसा र प्रतिसेयर नेटवर्थ २२० रुपैयाँ ९५ पैसार रहेको छ ।
वि.सं.२०७८ कात्तिक १७ बुधवार १०:१७ मा प्रकाशित