काठमाडौं । जानकी फाइनान्स कम्पनीले चालु आर्थिक वर्ष २०७८÷७९ को पहिलो त्रैमासमा साढे २ करोड बढी नाफा कमाएको छ ।
बुधवार कम्पनीले सार्वजनिक गरेको चालु आवको असोज मसान्तसम्मको वित्तीय विवरणले यस्तो देखाएको हो ।
उक्त अवधिमा कम्पनीले २ करोड ७९ लाख ४५ रुपैयाँ नाफा कमाएको छ । जुन गत वर्षको असोज मसान्तको तुलनामा १८९.१६ प्रतिशतले बढी हो । गत वर्षको सोही अवधिमा कम्पनीले ९६ लाख ६४ हजार रुपैयाँ नाफा कमाएको थियो ।
उक्त अवधिमा कम्पनीको खुद ब्याज आम्दानी ४ करोड ६ लाख ३३ हजार रुपैयाँ रहेको छ । गत वर्षको असोज मसान्तसम्मको तुलनमा भने खुद ब्याज आम्दानी २३.५४ प्रतिशतले बढेको हो ।
गत वर्षको सोही अवधिमा कम्पनीको खुद ब्याज आम्दानी ३ करोड २८ लाख ८८ हजार रुपैयाँ रहेको थियो ।
कम्पनीको चुक्ता पुँजी ६० करोड ४ लाख ११ हजार रुपैयाँ रहेको छ । कम्पनीले जगेडा तथा कोषमा भने १९ करोड ४९ लाख ७१ हजार रुपैयाँ राखेको छ ।
गत वर्षको सोही अवधिमा तुलनमा कम्पनीको खराब कर्जा भने ह्वात्तै घटाएको छ । गत वर्षको असोज मसान्तसम्म ४.३७ प्रतिशत रहेको खराब कर्जा यस वर्षको सोही अवधिमा १.६१ प्रतिशतमा झारेको छ ।
कम्पनीको प्रतिसेयर आम्दानी १८ रुपैयाँ ६२ पैसा र प्रतिसेयर नेटवर्थ १६४ रुपैयाँ ५२ पैसार रहेको छ ।
वि.सं.२०७८ कात्तिक १७ बुधवार १०:३० मा प्रकाशित
