काठमाडौं । युनिक नेपाल लघुवित्त वित्तीय संस्थाले ३ करोड बढी नाफा कमाएको छ ।
कम्पनीले बुधवार सार्वजनिक गरेको चालु आर्थिक वर्ष २०७८/७९ को पहिलो त्रैमासिक वित्तीय विवरणले यस्तो देखाएको हो ।
विवरण अनुसार चालु आवको असोज मसान्तमा कम्पनीले ३ करोड २३ लाख ६९ हजार रुपैयाँ नाफा गरेको छ ।
जुन गत वर्षको सोही अवधिका तुलनामा २९३.७८ प्रतिशतले बढी हो । गत वर्षको असोज मसान्तमा कम्पनीले ८२ लाख २० हजार रुपैयाँ मात्र नाफा कमाएको थियो ।
उक्त अवधिमा कम्पनीको खुद ब्याज आम्दानी ७ करोड ७ लाख ४२ हजार रुपैयाँ रहेको छ । जुन गत वर्षको असोज मसान्तको तुलनामा १७.४५ प्रतिशतले बढी हो ।
गत वर्षको सोही अवधिमा कम्पनीले ६ करोड २ लाख ३१ हजार रुपैयाँ खुद ब्याज आम्दानी गरेको थियो ।
कम्पनीको चुक्ता पुँजी ९ करोड ६८ लाख २० हजार रुपैयाँ रहेको छ । कम्पनीले जगेडा तथा कोषमा भने २१ करोड ८१ लाख २३ हजार रुपैयाँ राखेको छ ।
उक्त अवधिमा कम्पनीको खराब कर्जा झनै वृद्धि भएको छ । गत वर्षको असोज मसान्तमा ५.६२ प्रतिशत रहेको खराब कर्जा यस वर्षको सोही अवधिमा भने बढेर ६.३६ प्रतिशत पुगेको छ ।
वि.सं.२०७८ कात्तिक २४ बुधवार १२:५५ मा प्रकाशित
