काठमाडौ । नेकपा माओवादी केन्द्रका अध्यक्ष पुष्पकमल दाहाल प्रचण्डले सेयर बजार साम्राज्यवादको विस्तारित रुप भएको टिप्पणी गरेको भोलिपल्ट सोमबार सेयर बजार ७९.२३ अंकले ओरालो लागेको छ । आइतबार पनि बजार ८८ अंकले ओरालो लागेको थियो ।
हल्लाको पछाडी लाग्ने लगानीकर्ताहरु प्रचण्डको सो अभिव्यक्तिपछि सरकारले सेयर बजारमैत्री नीति नल्याउने आशंकाका साथ धमाधम आफूसँग भएको सेयर बेच्न थालेपछि बजार ओरालो लागेको हो । सोमबार दिनभर २३३ कम्पनीको ३ अर्ब ९९ करोड रुपैयाँ बराबरको सेयर किनवेच भएको छ ।
विगत केहीदिनदेखि ओरालो लाग्न थालेको बजारलाई प्रचण्डको बोलीले थप मलजल गरेको देखिएको छ । नेपाल राष्ट्र बैंकले सेयर कर्जामा ४/१२ को सिमा लगाएपछि बजार ओरालो लाग्न थालेको थियो । त्यस्तै तरलता अभावका कारण व्याजदरमा भएको बृद्धिले पनि बजारलाई ओरालो गति समाउनका लागि थप मद्धत गरेको थियो ।
पछिल्लो समयमा बजारमा ४३ लाख भन्दा बढी लगानीकर्ता संलग्न रहेको छ । प्रचण्डले लगानीकर्ताहरुको भावना विरोधी बोलेका कारण बजार ओरालो लागेर २२८२ अंकमा अडिएको छ । यो विन्दू यस बर्षकै सवैभन्दा कम हो ।
सोमबार अन्य समुहगत परिसुचकहरु पनि ओरालो लागेको नेपाल स्टक एक्सचेन्जले जनाएको छ । घटेको बजारमा पनि पाँच कम्पनीले कमाएका छन् । यसदिन सवैभन्दा बढी गुँरास फाइनान्स लिमिटेडले ९.४७ प्रतिशतको हाराहारीमा कमाएको छ ।
वि.सं.२०७८ मंसिर २७ सोमवार १५:२८ मा प्रकाशित
