काठमाडौं । नेपाल लाईफ इन्स्योरेन्स कम्पनीले उपसमिति संख्या १४ बाट घटाएर ५ वटा कायम गरेको छ । बीमा समितिको कारबाहीपछि कम्पनीले उपसमिति घटाएको हो ।
बीमा समिति स्रोतका अनुसार बीमक(बीमा कम्पनी)को संस्थागत सुशासन निर्देशिका २०७५ विपरित उपसमितिहरु गठन गरेपछि कम्पनी कारबाहीमा परेको हो ।
संस्थागत सुशासन बाहीर गई कम्पनीको संचालक समितिले दर्जन्भन्दा बढी उपसमितिहरु गठन गरि बैठकबस्दै भत्ता लिँदै गरेपछि समितिले १० हजार रुपैयाँ नगद जरिवानासहित कारवाही गरेको थियो ।
बिमकको संस्थागत सुशासन निर्देशिका २०७५ को दफा ३ को उफदफा १ बमोजिम बीमकमा स्वतन्त्र विमक सचालक सहितको कम्तीमा पाँच र बढीमा सात जना सञ्चालकहरुको समिति रहन्छ ।
अर्काेतर्फ सोही निर्देशिकाको दफा १४ को उपदफा १ अनुसार लेखा परिक्षक बाहेक अन्य समिति वा उपसमितिमा दुई जना भन्दा बढी सञ्चालक उपसमितिको सदस्य हुन पाउँदैन ।
त्यस्तै सोही निर्देशिकाको दफा १४ उपदफा ९ बमोजिम एउटा समितिमा संयोजक रहेको सञ्चालक अर्काे समिति वा उपसमितिमा संयोजक हुन पाउँदैन ।
उल्लेखित निर्देशन अनुसार बढीमा सात जनाको समूहले एक एक संयोजक पाउने गरी उपसमिति गठन गरेपनि सात भन्दा बढी उपसमिति हुन पाउँदैन ।
यद्यपी नेपाल लाइफ इन्स्योरेन्सले सोही निर्देशन उल्लंघन गर्दै कम्पनीको संचालकमध्ये कमलेश कुमार अग्रवाल ८ वटा र बिमल प्रसाद ढकाल ३ वटा उप समितिमा संयोजक रहने गरी उपसमिति गठन गरेका थिए ।
यसरी नियम विपरित उपसमिति गठन गरि बैठक बस्दै भत्ता लिँदै गरेको समितिले पुष्टि गरेपछि कारबाहीमा परेको हो ।
समितिको कारवाहीमा परेको यसै इन्स्योरेन्सले अझ आफुलाई नम्बर वान जीवन बीमा कम्पनी भएको दाबी गर्दै प्रचार प्रसार गरिरहेको छ ।
बीमा समितिका प्रवत्ता राजुरमण पौड्यालले केही सूचकमा अग्रता हाँसिल गर्दैमा नम्बर वान नहुने बताउँछन् । सूचकहरुमा अग्रता, अग्रतामा सहि बाटो र कम्पनीले सुशासनको कुरालाई पनि ध्यान राख्नुपर्ने उनको भनाई छ ।
वि.सं.२०७८ माघ २ आइतवार १४:५६ मा प्रकाशित
