काठमाडौं । बाणिज्य बैंकहरुले कर्जा दिन बन्द गरेका छन् । नेपाल बैंकर्स संघको तथ्यांक अनुसार एक हप्तामा २७ वटा बाणिज्य बैंकहरुले जम्मा १ अर्ब रुपैयाँ मात्र कर्जा प्रबाह गरेका छन् ।
तरलता अभावका कारण बंैकहरुको सिडि रेसियो ९०.२७ पुगेको छ । नेपाल राष्ट्र बैंकले २०८९ असार मसान्तभित्र सिडि रेसियो ९० प्रतिशत भित्र नै राख्नुपर्ने प्रावधान राखेको छ । जसका कारण बाणिज्य बैंकहरु थप कर्जा प्रबाह गर्न सकिरहेका छैनन् ।
गत साता निक्षेप भने ४ अर्ब रुपैयाँले बढेको छ । तर माघ महिनाको २१ दिनमा बाणिज्य बैंकहरुबाट १३ अर्ब रुपैयाँ बराबरको निक्षेप घटेको छ। गत पुस मसान्तसम्ममा बाणिज्य बैंकहरुसँग ४३ खर्ब २४ अर्ब रुपैयाँ निक्षेप रहेकोमा माघ २१ गतेसम्म आइपुग्दा सो रकम घटेर ४३ खर्ब ११ अर्ब रुपैयाँ भएको छ ।
नेपाल बैंकर्स एसोसिएसनका अनुसार माघको पहिलो साता बाणिज्य बैंकहरुले १३ अर्ब रुपैयाँ निक्षेप गुमाएका थिए भने दोस्रो साता ३ अर्ब गुमाएका थिए ।
२१ दिनको अवधिमा बाणिज्य बैंकहरुले जम्मा ६ अर्ब रुपैयाँ बराबरको कर्जा प्रबाह गरेका छन् । महिनाको पहिलो हप्ता बाणिज्य बैंकहरुले १ अर्ब रुपैयाँ बराबरको कर्जा प्रबाह गरेका थिए भने दोस्रो हप्ता ४ अर्ब रुपैयाँ कर्जा प्रबाह गरेका छन् ।
तरलता अभाव चर्किदै गएपछि बैंकहरुले नियामकीय प्रावधानहरुका लागि चाहिने तरलता राख्नका लागि कर्जा प्रबाह रोकेका हुन् । चालु आर्थिक वर्षभरी भने बाणिज्य बैंकहरुले कुल ४ खर्ब २८ अर्ब रुपैयाँले ऋण प्रबाह गरेका छन् भने निक्षेप ११० अर्बले बढाएका छन् ।
वि.सं.२०७८ माघ २४ सोमवार १८:१२ मा प्रकाशित
