काठमाडौ । नेपाल राष्ट्र बैंकले मौद्रिक नीतिको समिक्षा यही हप्ताभित्र गर्नेगरी तयारी थालेको छ । मौद्रिक नीतिको अर्धबार्षिक समिक्षा गर्दा राष्ट्र बैंकले नयाँ नीतिहरु पनि ल्याउने गरेको छ ।
चरम तरलताको अभाव तथा विदेशी मुद्रा संचितिमा चाप परेपछि राष्ट्र बैंकले संकटलाई टार्नेगरी आयातमा कडाई गर्न लागेको हो । यसअघि पनि राष्ट्र बैंकले विलासीताका २० वटा बस्तुहरुको आयातमा कडाई गरेको थियो ।
ति बस्तुको कडाइका कारण २ अर्ब रुपैयाँ विदेश जानबाट रोकिएको भन्सार विभागको तथ्यांकमा देखिएको छ । तर आयातमा गरिएको कडाईले तरलताको अभावलाई भने कम गर्न सकेको छैन ।
नेपाल बैकर्स संघका अनुसार पछिल्लो साता कर्जा प्रबाह ठप्प जस्तै भएको छ । गत साता बाणिज्य बैंकहरुले जम्मा १ अर्ब रुपैयाँ मात्र कर्जा प्रबाह गरेका छन् । त्यस्तै तरलताका संकटका कारण सो महिनाको तीन हप्तासम्ममा पनि बैंकहरुले जम्मा ६ अर्ब रुपैयाँ मात्र कर्जा प्रबाह गरेका छन् ।
सोही अवधिमा १३ अर्ब रुपैयाँ बराबरको निक्षेप बैंकबाट बाहिर गएको छ । पछिल्लो समयमा व्यक्तिगत कर्जामा व्याज बढी आउने भएपछि निक्षेप झिकेर व्यक्तिगत व्याज दिन लागेका कारण बैंकबाट निक्षेप बाहिर गएको बैंकर्स संघको अनुमान रहेको छ।
यी सवै समस्याहरुको संबोधन हुनेगरी मौद्रिक नीतिको अर्धबार्षिक समिक्षा मार्फत नीतिगत परिवर्तनहरु हुने बैंकर्स संघले विश्वास रहेको छ । बैंक तथा वित्तिय संस्थाहरुको छाता संगठनहरुले मौद्रिक नीतिको अर्धबार्षिक समिक्षा गर्दा परिवर्तन गर्नपर्ने नीति नियमहरुका बारेमा आ -आफ्नो धारणाहरु पठाइ सकेको नेपाल राष्ट्र बैंकका सहायक प्रबक्ता नारायण प्रसाद पोखरेलले बताए ।
उनका अनुसार राष्ट्र बैंकले पाएको सुझाव तथा संकलन गरेको तथ्यांकहरु विश्लेषण गर्ने काम गरिरहेको र यही हप्ता मौद्रिक नीतिको समिक्षा गरिने छ ।
वि.सं.२०७८ माघ २५ मंगलवार १४:२७ मा प्रकाशित