काठमाडौ । सहकारी क्षेत्रमा विकृतिहरु फैलदै गएपछि सहकारी विभागले एकीकृत निर्देशन ल्याउन तयारी गरिरहेको छ । अर्थमन्त्रालय र नेपाल राष्ट्र बैंकको सल्लाहमा सहकारी विभागले यस क्षेत्रलाई व्यवस्थित पार्न भन्दै एकीकृत निर्देशन ल्याउने तयारी गरेको हो ।
अर्को अर्थमा भन्दा हामीले पनि राष्ट्र बैंकले बैंक तथा वित्तिय संस्थालाई दिने निर्देशन जस्तैगरी एकीकृत गरे निर्देशन ल्याउन लागेका हौ विभागका रजिष्टार डा.झलकराम अधिकारीले भने ।
उनका अनुसार विगतमा विभागले दिएको छोटा छोटा निर्देशनहरु र विभागले नयाँ जारी गर्न लागेको निर्देशनलाई एकैठाउँमा राखेर नयाँ एकीकृत निर्देशन ल्याउने छ ।
विभागले पहिलो चरणमा राष्ट्रिय सहकारी महासंघ लगायत सहकारी क्षेत्रका केन्द्रिय निकायहरुको सुझाव संकलन गरेको थियो भने दोस्रो चरणमा सहकारी अभियानका नेताहरुको सुझावहरु संकलन गरेको थियो । सम्बन्धीत निकायको सुभावपछि मंगलबार अन्तिम चरणका लागि अभियानसँगको छलफलपछि ५७ वटा बुदामा निर्देशन दिनेगरी तयारी गरेको छ ।
सो निर्देशनमा सहकारीले लिने सेवा शुल्कदेखि उनीहरुको कार्यक्षेत्र, आन्तरिक शुसासन, अन्तरसहकारी कारोबारलाई कन्ट्रोल गर्ने विषयहरु समावेश गरिने रजिष्टार डा. अधिकारीले जानकारी दिए ।
रजिष्टार डा. अधिकारीका अनुसार विभागले ५७ वटा बुदा भएको एकीकृत निर्देशनलाई अझ कम गर्ने तयारीका साथ थप छलफल भइरहेको र आइतबार फागुन १ गते निर्देशन जारी गर्ने जानकारी दिए ।
सहकारी ऐन २०७४ र सहकारी नियमावली २०७५ पूर्णरुपमा कार्यान्वयन गर्न निर्देशनले सहजीकरण गर्ने विभागले जनाएको छ । त्यस्तै निर्देशनमा दोहोरो सदस्यता, मुख्य कारोबार, कर्जा सूचना केन्द्र, कर्जा असुली न्यायाधिकरणलगायत धेरै विषय कार्यान्वयन हुन नसकेकोले त्यसलाई थप सहजीकरण गरी कार्यान्वयनमा ल्याउनेगरी निर्देशन जारी गरिने विभागले जनाएको छ ।
विभागले सहकारी ऐन २०७४ जारी भएपछि पहिलोपटक एकीकृत निर्देशन जारी गर्न लागेको हो । ऐनमा रजिस्ट्रारले सहकारी संस्थाका लागि निर्देशन जारी गर्ने व्यवस्था छ । सम्पत्ति शुद्धीकरण निवारणसम्बन्धी प्रावधान कार्यान्वयनका लागि पनि एकीकृत निर्देशनमा १७ वटा बुदा राखिएको छ ।
शंकास्पद तथा सीमाभन्दा बढीको कारोबारको रिर्पोटिङको प्रावधान कार्यान्वयनमा जोड दिन पनि निर्देशनले सघाउने छ । त्यस्तै ५ प्रतिशत भन्दा बढी खराब कर्जा भएका सहकारीको लाभांशमा रोक लगाउनुका साथै सेवाकेन्द्रमा पनि कडाइ गर्ने विभागको तयारी छ ।
वि.सं.२०७८ माघ २७ बिहीवार १३:२८ मा प्रकाशित