काठमाडौ । खर्च हुन नसक्ने भएपछि सरकारले बजेटको आकार घटाएको छ । प्रतिस्थापन विधेयक मार्फत ल्याएको बजेटमा सरकारले ८६ अर्ब घटाएको हो । तत्कालिन अर्थमन्त्री विष्णु प्रसाद पौडेलले संसदमा प्रस्तुत गरेको बजेटमा नै १५ अर्ब घटाएर बजेट प्रस्तुत गरेका शर्माले खर्च हुन नसक्ने भएपछि बजेट थप घटाएका हुन् ।
सरकारले विहिबार बजेटको अर्धबार्षिक समिक्षा गर्दै बजेटको आकार खुम्च्याएर १५ खर्ब ४६ अर्ब २८ करोड बनाएको छ । यसअघि प्रतिस्थापन बजेट १६ खर्ब ३२ अर्ब ८३ करोड रुपैयाँ थियो । त्यस्तै सरकारले पुँजीगत खर्च ९०.१ प्रतिशत हुने भन्दै पुँजीगत खर्चको लक्ष्यपनि घटाएर ३ खर्ब ४० अर्ब ३२ करोडमा सिमित राखेको छ ।
त्यस्तै चालुखर्चमा भने जम्मा २.८ प्रतिशत मात्र घटाएर १० खर्ब ३५ अर्ब ४६ करोड रुपैयाँ राखेको छ। त्यसैगरी वित्तिय व्यवस्थापनतर्फ ९० प्रतिशत अर्थात १ खर्ब ७० अर्ब ४९ करोड रुपैयाँ कायम गरेको छ ।
बैदेशिक ऋणको लक्ष्य पनि ७६ अर्ब ८३ करोडले घटाएको छ । प्रतिस्थापन विधेयक मार्फत सरकारले २ खर्ब ८३ अर्ब ९ करोड उठाउने बताएपनि कतिपय बैदेशिक ऋणका लागि कूनैपनि प्रोसेस नभइकन नै बजेटमा राखिएकोले सो रकम घटाएको अर्थमन्त्री जनार्दन शर्माले जानकारी दिएका छन् ।
घटाएपछि सरकारले बैदेशिक ऋणतर्फ २ खर्ब ६ अर्ब ४६ करोड रुपैयाँ बैदेशिक ऋण उठाउने लक्ष्य राखेको छ । तर सरकारले बैदेशिक अनुदानमा पनि ९२ करोड रुपैयाँले घटाएर ५० अर्बको लक्षय राखेको छ ।
त्यस्तै सरकारले आन्तरिक ऋण र राजस्वको लक्ष्य भने परिवर्तन गरेको छैन । यसरी बजेटको आकार सानो बनाएपनि स्थानीय तहको निर्वाचन हुने भएपछि आर्थिक क्रियाकलापहरु बढ्ने भन्दै आर्थिक बृद्धिदरको लक्ष्यमा भने कुनै परिवर्तन गरेको छैन । सरकारले आथिृक बृद्धिदर भने सात प्रतिशत नै हुने दावी गरेको छ ।
वि.सं.२०७८ माघ २७ बिहीवार १६:३३ मा प्रकाशित