काठमाडौं । व्यवसायी संजय अधिकारी र टंक शमशेर जवराको चेक वाउन्स भएको उजुरीका आधारमा मदिरा व्यवसायी अमित अग्रवाल पक्राउ परेका छन् । महानगरीय प्रहरी परिसर काठमाडौंको टोलीले उनलाई बैकिङ कसुरमा पक्राउ गरेको जनाएको छ ।
प्रहरीका अनुसार अग्रवाललाई अधिकारीको ५० लाख र राणाको डेढ करोड रुपैयाँको चेक नसाटिएपछि उनीहरुकै उजुरीको आधारमा पक्राउ गरीएको हो । अग्रवाल मदिरा विक्रि गर्ने ग्रीनलाइनका सञ्चालक हुन् । उनी धेरै ऋण भएपछि तिर्न नसकिने भन्दै भारत गएका थिए । उनी भागेपछि चारवटा बैंकको ऋण डुव्ने खतरा थियो ।
उनी केही समयपछि फर्किएसँगै उनले पत्रकार सम्मेलन नै गरेर आफ्नो सम्पत्तिबाट बैंकको ऋण तिर्न सक्ने अवस्था रहेको समेत बताएका थिए । अग्रवाललाई अदालतबाट बैकिङ कसुर मुद्दामा म्याद थप गरेर अनुसन्धान भइरहेको प्रहरीले जानकारी दिएको छ।
मिटर ब्याजीले पैसा नतिरे ज्यान मार्ने धम्की दिएपछि एकाएक नेपाल छोडेर भारत पस्नुपरेको उनको गुनासो थियो । अग्रवालको परिवारले विभिन्न बैंक र व्यक्तिसँग मिटर ब्याजमा एक अर्बभन्दा बढी ऋण लिएको देखिएको छ।
वि.सं.२०७८ फागुन ९ सोमवार १३:२४ मा प्रकाशित
