काठमाडौै । माघ महिनामा १२ अर्ब ८१ करोड २७ लाख ३८ हजारले आयात घटेको छ । नेपाल राष्ट्र बैंकले ४७ वटा बस्तुहरुको आयातमा कडाई गरेसँगै माघ महिनामा ति बस्तुहरुको आयातमा कमी आएका कारण कमी आएको हो ।
भन्सार विभागका अनुसार माघ महिनामा मात्र नेपालमा १ खर्ब ४८ अर्ब १२ करोड १७ लाख २८ हजार रुपैयाँ बराबरको आयात भएको छ भने पुस महिनामा १ खर्ब ६० अर्ब ९३ करोड ४४ लाख ६६ हजार रुपैयाँ बराबरको आयात भएको छ ।
नेपाल राष्ट्र बैंकले दुई चरणमा विलासिताको बस्तुहरुको आयातमा ५० र शतप्रतिशतको नगद मार्जिनको व्यवस्था गरेपछि आयातमा केही कमी आएको हो ।
भन्सार विभागका अनुसार चालु आर्थिक बर्षको सात महिनामा व्यापारघाटा ३८.४५ प्रतिशतले बढेर १० खर्ब १५ अर्ब ८० करोड रुपैयाँ पुगेको छ । गत आर्थिक बर्षको ७ महिनामा व्यापारघाट ७ खर्ब ३३ अर्ब रहेको थियो ।
नेपाल राष्ट्र बैंकको तथ्यांक अनुसार पुँजीगत आयमा कमी आएको छ भने उपभोग्य बस्तुहरुको आयातमा बृद्धिभएको छ । चालु आर्थिक बर्षको ७ महिनामा देशभित्र ११ अर्ब ४७ अर्ब ४६ करोड रुपैयाँको आयात भएको छ भने निर्यात १ खर्ब ३१ अर्ब रुपैयाँ बराबरको रहेको छ ।
आयात र निर्यातमा भएको ठूलो खाँडलका कारण व्यापारघाटामा बृद्धि भएको हो । यसले देशको शोधनान्तर घाटामा थप चाप पर्ने देखिएको छ भने घट्दो विदेशी मुद्राको संचिति थप घट्ने देखिएको छ ।
वि.सं.२०७८ फागुन १० मंगलवार १४:०४ मा प्रकाशित
