काठमाडौं । नबिल बैंक र नेपाल बंगलादेश बैंकले विशेष साधारण सभा बोलाएका छन् । यी दुवै बैंक मर्जरमा जानका लागि विशेष साधारण सभा बोलाएका हुन् ।
यी दुवै बैंकले आउदो जेठ ७ गते छुट्टाछुट्टै विशेष साधारण सभा बोलाएका हुन् । नबिल बैंकको बैशाख २२ गते बिहान ९ बजे बसेको ५९५औं बैठकले जेठ ७ गते विशेष साधारण सभा गर्ने निर्णय गरेको हो ।
नबिल बैंकले विशेष साधारण सभा प्रयोजनका लागि बैंकले बैशाख ३० गते एक दिनका लागि बुक क्लोज गर्ने भएको छ । बैंकले नेपाल बंगलादेश बैंक (एनबी) गाभ्ने अन्तिम तयारीमा रहेको छ ।
जसका लागि एक्विजिसनको अख्तियारी प्रस्ताव पारित गर्न नबिल बैंकले विशेष साधारणसभा पनि बोलाएको हो ।
यस्तै, नेपाल बंगलादेश बैंकले जेठ ७ गते विशेष साधारण सभा बोलाएको छ ।
बैंकको वैशाख २२ गतेको सञ्चालक समितिको बैठकले भर्चुअल माध्यमबाट बिहान ११ बजे विशेष साधारण सभा गर्ने निर्णय गरेको हो ।
सभाले यस बैंकलाई नबिल बैंक लिमिटेडले प्राप्ति गर्ने प्रस्तावलाई स्वीकृति प्रदान गर्नेछ ।
प्राप्ति प्रयोजनका लागि मूल्यांकनकर्ताबाट प्राप्त लक्षित संस्थाको सम्पत्ति, दायित्व तथा कारोबारको मूल्यांकन प्रतिवेदन बमोजिम सिफारिस गरिएको शेयर आदान प्रदान अनुपातलाई समेत सभाले अन्तिम स्वीकृति प्रदान गर्नेछ ।
वि.सं.२०७९ वैशाख २३ शुक्रवार १२:०७ मा प्रकाशित
