काठमाडौं । वाणिज्य बैंकहरुले धमाधम वित्तीय विवरण सार्वजनिक गर्न थालेका छन् । बैंकहरुले गत आर्थिक वर्ष २०७८/७९ को चौंथो त्रैमासिक वित्तीय विवरण प्रकाशित गरेका हुन् ।
हालसम्म संचालनमा रहेका मध्ये एक दर्जन वाणिज्य बैंकहरुले गत आवको चौंथो त्रैमासिक वित्तीय विवरण सार्वजनिक गरेका हुन् ।
२६ वटा वाणिज्य बैंकहरुमध्ये हालसम्म एनआईसी एशिया बैंक, ग्लोबल आईएमई बैंक, प्रभु, सनराइज, माछापुच्छ्रे, सिटिजन्स, लक्ष्मी, सानिमा र एनसीसी बैंक, स्टयाण्डर्ड चार्टर्ड र एभरेष्ट बैंकले गत आवको असार मसान्सम्मको वित्तीय विवरण सार्वजनिक गरेका हुन् ।
बैंकहरुको विवरण अनुसार १२ वटा बैंकले गत आवको असार मसान्तसम्ममा ३३ अर्ब ७१ करोड ६२ लाख ८८ हजार रुपैयाँ नाफा कमाएका छन् । बैंकहरुको यो नाफा अघिल्लो आवको सोही अवधिको तुलनामा भने २९.८९ प्रतिशतले बढी हो । अघिल्लो आवको चौंथो त्रैमासमा बैंकहरुले २५ अर्ब ९५ करोड ५५ लाख १२ हजार रुपैयाँ नाफा गरेका थिए ।
उक्त अवधिमा सबैभन्दा बढी नाफा वृद्धि गर्नेमा स्टायाण्डर्ड चार्टर्ड बैंक रहेको छ । बैंकले गत आवमा ६२.२६ प्रतिशतले नाफा वृद्धि गरि २ अर्ब २६ करोड ९८ लाख ५५ हजार रुपैयाँ पुर्याएको छ । बैंकले अघिल्लो आवको असार मसान्तमा भने १ अर्ब ७७ करोड ९ लाख ३९ हजार रुपैयाँ नाफा कमाएको थियो ।
उक्त अवधिमा नाफा वृद्धि गर्नेको दोस्रो स्थानमा नेपाल क्रेडिट एण्ड कमर्श (एनसीसी) बैंक देखिएको छ । बैंकले गत आवको असार मसान्तसम्ममा २ अर्ब २ करोड ३३ लाख २२ हजार रुपैयाँ नाफा कमाएको छ । जुन अघिल्लो आवको सोही अवधिमा तुलनामा ५१.९७ प्रतिशतले बढी हो । अघिल्लो आवमा भने कम्पनीको नाफा १ अर्ब ३३ करोड ६ लाख २५ हजार रुपैयाँ रहेको थियो ।
नाफा वृद्धि गर्नेको तेस्रो स्थानमा रहेको प्रभु बैंकले पनि गत आवमा ५१.१० प्रतिशत बढाएर २ अर्ब ६० करोड ३ लाख ९६ हजार रुपैयाँ पुर्याएको छ । बैंकले अघिल्लो आवको चौंथो त्रैमासमा भने १ अर्ब ७२ करोड ८ लाख ७५ हजार रुपैयाँ नाफा कमाएको थियो ।
उक्त अवधिमा सबैभन्दा बढी नाफा कमाउनेमा भने ग्लोबल आइएमई बैंक पहिलो स्थानमा देखिएको छ । बैंकले गत आवमा ५ अर्ब २० करोड ६४ लाख ५५ हजार रुपैयाँ नाफा कमाएको छ । बैंकको यो नाफा अघिल्लो वर्षको तुलनामा भने २५ प्रतिशतले बढी हो । अघिल्लो वर्षको चौंथो त्रैमासमा बैंकले ४ अर्ब १६ करोड ५१ लाख ५२ हजार रुपैयाँ नाफा कमाएको थियो ।
यस्तै, नाफा बढी कमाउनेको दोस्रो स्थानमा एनआईसी एशिया बैंक रहेको छ । गत आवको असार मसान्तसम्मा बैंकको नाफा ३८.८६ प्रतिशतले बढेर ४ अर्ब ५२ करोड ५४ लाख २२ हजार रुपैयाँ पुगेको छ । अघिल्लो आवको सोही अवधिमा बैंकले ३ अर्ब २५ करोड ५८ लाख ३४ हजार रुपैयाँ नाफा कमाएको थियो ।
त्यसैगरि गत आवको असार मसान्तसम्म सनराइज बैंकले पनि ४८.६९ प्रतिशतले नाफा बढाएर २ अर्ब १५ करोड ९ लाख ४४ हजार रुपैयाँ पुर्याएको छ भने एभरेष्ट बैंकले २ अर्ब ५४ करोड ६० लाख ५९ हजार रुपैयाँ नाफा कमाएको छ । जुन अघिल्लो आवको चौंथो त्रैमाससम्मको तुलनामा ४३.७७ प्रतिशतले बढी हो ।
उक्त अवधिमा माछापुच्छ्रे बैंकले २ अर्ब १६ करोड ९ लाख, सिटिजन्स बैंकले २ अर्ब २५ करोड ११ लाख ७१ हजार, लक्ष्मी बैंकले १ अर्ब ६० करोड ३५ लाख ७१ हजार रुपैयाँ नाफा कमाएका छन् । यी बैंकहरुको नाफा क्रमशः ३४.४२ प्रतिशत, २४.७६ प्रतिशत, १.७६ प्रतिशतले वृद्धि भएको हो ।
गत आवको चौंथो त्रैमासमा सानिमा बैंकको नाफामा भने झिनो गिरावट देखिएको छ । गत आवको असार मसान्तमा बैंकको नाफा १.०७ प्रतिशतले घटेर २ अर्ब २९ करोड २९ लाख ९ हजार रुपैयाँ कायम भएको छ । बैंकले अघिल्लो आवमा बैंकको नाफा २ अर्ब ३१ करोड ७८ लाख २१ हजार रुपैयाँ रहेको थियो ।
वि.सं.२०७९ साउन १२ बिहीवार १३:०६ मा प्रकाशित
