काठमाडौं । प्रभु बैंक र सेञ्चुरी कमर्सियल बैंक मर्जरमा जाने भएका छन् । यी दुवै बैंक एक आपसमा मर्जरमा जानका लागि सहमति गरेका हुन् ।
आइतबार यी दुवै बैंकबीच मर्जरसम्बन्धी सम्झौतापत्रमा हस्ताक्षर भएको छ । अहिले १ बराबर १ अनुपातमा मर्जमा जान दुई बैंक सहमत भएका छन् ।
दुबै बैंकको सम्पत्ति दायित्व मूल्यांकन (डीडीए) रिपोर्ट प्राप्त भएपछि वास्तविकता आउने र त्यसैका आधारमा स्वाप रेसियो तय गर्ने सहमति भएको प्रभु बैंकका प्रमुख कार्यकारी अधिकृत (सीईओ) अशोक शेरचनले जानकारी दिनुभयो । उहाँका अनुसार मर्जपछि प्रभु बैंकको नाममा बैंकिङ कारोबार हुनेछ ।
दुई बैंक मर्ज भएमा चुक्ता पुँजी २२ अर्ब पुग्ने छ । हाल सेञ्चुरी बैंकको को चुक्ता पुँजी ९ अर्ब ५५ करोड र प्रभुको चुक्ता पुँजी १२ अर्ब ७० करोड रुपैयाँ रहेको छ ।
वि.सं.२०७९ साउन १६ सोमवार १०:११ मा प्रकाशित