भैरहवा । रुपन्देहीको सियारी गाउँपालिका-१ का वडाअध्यक्ष अरुण शाहीले प्रहरी प्रशासनले खानतलासीको नाममा ज्यादती गरकाे आराेप लगाएका छन् । उनका अनुसार प्रहरीले मंगलबार मध्यराति घरैमा आएर आफूले प्रयोग गर्ने बा१६च २३६३ नम्बरको गाडी खानतलासीकाे नाममा टर्चर दिएकाे छ ।
वडाअध्यक्ष शाहीले बुधबार सियारी–१ निवासमा पत्रकार सम्मेलन आयाेजना गरी घटनाबारे जानकारी दिएका छन् । खानतलासी गर्न पाउने प्रहरीको अधिकार भए पनि खानतलासी पुर्जी नदिइ एक्कासी आएर राजनीतिक प्रतिसोध साँधेकाे उनकाे भनाइ छ ।
पार्किङ गरेर राखेको गाडी खानतलासी गर्दा केही नभेटेपछि प्रहरी फर्केको थियो । सवारी चेकजाँच गर्दा उनी घरमा थिएनन् । वडाअध्यक्षको गाडी शंकास्पद भएको भन्दै वडा प्रहरी कार्यालय भैरहवाबाट खटिएको प्रहरी टोलीले मंगलबार राति चेकजाँच तथा खानतलासी गरेको थियो । वडा प्रहरी कार्यालय भैरहवाका प्रहरी निरीक्षक मधु नेपाल नेतृत्वमा गएकाे टाेलीले मध्यरातमै माथिकाे आदेश भन्दै खानतलासी गरेकाे थियाे । दाेस्राे पटक निर्वाचित भएका वडाध्यक्ष शाहीलाई स्थानीयले समेत साथ दिँदै आएका छन् ।
पूर्व गृहमन्त्री तथा राप्रपा नेता निरन्जन थापाले प्रहरी दबाब र प्रभावमा परेर कानुनविपरित काम नगर्न चेतावनी दिए । प्रहरीले अनावश्यक रुपमा दु:ख गर्ने गरी मध्यरातमा घरमै पुगेर गरेकाे कार्यप्रति राप्रपाले विराेध गरेकाे छ।
वि.सं.२०७९ कात्तिक ३० बुधवार १६:०५ मा प्रकाशित
