काठमाडौं । अर्थ मन्त्रालयले खर्च घटाउने मापदण्ड–२०७९ तयार गरेको छ । मन्त्रालयले चालु खर्च कम गर्न विभिन्न शीर्षकको बजेट कटौती गर्न मापदण्ड बनाएको हो ।
मन्त्रालयले बजेट निर्माणमा खट्ने कर्मचारीको भत्ता ५० प्रतिशतले कटौती गर्ने भएको छ । यसअघि बजेट निर्माणको समयमा राति काम गर्ने कर्मचारीलाई ६०० रुपैयाँ दैनिक भत्ता दिने व्यवस्था थियो । यो वर्ष बजेट निर्माणको काम गर्ने कर्मचारीले ३०० रुपैयाँ मात्र भत्ता पाउनेछन् ।
खर्च कटौती चालु आर्थिक वर्ष २०७९/०८० को बजेट कार्यान्वय गर्न गरिएको अर्थ मन्त्रालयका प्रवक्ता आनन्द काफ्लेले बताए । चालु आर्थिक वर्षको बजेटको बुँदा नम्बर ३७९ मा सरकारी निकायको चालु प्रकिृतिको प्रशासनिक खर्च न्यूनतम १५ प्रतिशतले घटाउने गरी बजेट कार्यान्वयन गरिने उल्लेख छ ।
मन्त्रालयले अनावश्य गोष्ठी तथा कार्यक्रम नगर्ने पनि बताएको छ । मन्त्रालयमा प्रयोग हुने बोतलको पानीलाई निरुत्साहित गरी जारको पानी प्रयोग गर्न प्रोत्साहन गर्ने मापदण्डमा उल्लेख छ । खर्च कटौतीका लागि मन्त्रालयले १७ बुँदाको मापदण्ड तयार पारेको छ । त्यसमा कर्यालयले प्रयोग गर्ने हिटरदेखि विज्ञापन खर्च कटौती गर्ने उल्लेख छ ।
वि.सं.२०७९ माघ ५ बिहीवार १७:२२ मा प्रकाशित
