काठमाडौं । प्रधानमन्त्री पुष्पकमल दाहाल प्रचण्डसँग राष्ट्रिय स्वतन्त्र पार्टीका सभापति रवि लामिछानेले भेट गरेका छन्। प्रधानमन्त्री निवास बालुवाटारमा पुगेर बिहीबार बिहान लामिछानेले प्रधानमन्त्रीलाई भेटेका हुन् ।
लामिछानेले प्रधानमन्त्रीसँग आफूलाई गृहमन्त्री नबनाए आफ्नो पार्टीकै व्यक्तिलाई गृहमन्त्री बनाउनुपर्ने बताए । जवाफमा प्रचण्डले गृहमन्त्रीमा आफ्नो पार्टीले समेत दावी रहेकाले सहमति खोजिनुपर्ने जवाफ दिएको स्रोतले जनाएको छ।
रास्वपाका अध्यक्ष लामिछानेले सरकार गठनका क्रममा आफ्नो पार्टीले गृह मन्त्रालय पाएको र विगतको सहमति बमोजिम नै बदलिदो अवस्थामा पनि सो मन्त्रालयमा आफ्नो दलको दावी कायमै रहेको बताए ।
तर,लामिछाने आफैले गृहमन्त्री पाउनुपर्ने अडानबाट भने पछि हटेका छन् । एमाले अध्यक्ष केपी शर्मा ओलीले लामिछानेलाई पुनः गृहमन्त्री बनाउन भनेपनि प्रधानमन्त्री दाहालले दोहोरो नागरिकताको विषय विवादित रहेको र अदालतको पूर्णपाठ समेत आउन बाँकी रहेकाले तत्काल त्यो संभव नभएको अडान राखेका थिए । माओवादी केन्द्रका पदाधिकारीहरूले समेत पुनः लामिछानेलाई गृहमन्त्री नबनाउन प्रधानमन्त्री दाहाललाई दबाब दिएका थिए ।
स्रोतका अनुसार,आफू नभएपछि आफूले भनेका व्यक्तिलाई लामिछानेले गृहमन्त्री बनाउन कसरत सुरु गरेका छन् । तर, प्रधानमन्त्री दाहालले गृहमन्त्रालय छाड्न लामिछानेलाई भनेको तर लामिछाने नमानेको बालुवाटार स्रोतले बताएका छ ।
प्रधानमन्त्री दाहालले गृहमन्त्रालय आफूले पाए रास्वपालाई कुनै अर्को मन्त्रालय दिने समेत भनेका थिए । गृहमन्त्रालय माओवादी केन्द्रले पाए माओवादीले चलाई रहेको अर्को रोज्जा मन्त्रालय रास्वपालाई दिन आफू तयार रहेको प्रधानमन्त्री दाहालले भनेका थिए ।
तर, लामिछानेले सोबारे आफू पार्टीमा छलफल गर्ने भनेर बिहीबार बिहान बालुवाटारबाट बाहिरिएका थिए । स्रोतका अनुसार,लामिछानेले बिहीबार बिहानमात्र प्रचण्डलाई दुई पटक भेटेका छन् ।
वि.सं.२०७९ माघ १९ बिहीवार १४:१४ मा प्रकाशित