काठमाडौं । विकास बैंकहरुले निक्षेपतर्फको ब्याजदर घटाउने निर्णय गरेका छन् । विकास बैंकहरुको छाता संगठन डेभलपमेन्ट बैंकर्स एसोसिएसन (डिबान) को आज शुक्रबार बसेको बैठकले फागुनमा निक्षेपको ब्याजदर घटाउने निर्णय गरेको हो।
डिबानका अध्यक्ष प्रद्युमन पोखरेलले माघ महिनामा कायम ब्याजदरमा फागुनमा ०.२५ प्रतिशत विन्दुले निक्षेप तर्फको ब्याजदर घटाउने निर्णय गरेको बताए।
उनले भने, ‘हालको ब्याजदरमा ०.२५ प्रतिशतको विन्दु घटाउँदै फागुनमा मुद्दति निक्षेपमा व्यक्तिगततर्फ अधिकतमा ११.७५ प्रतिशत, संस्थागतर्फ ९.७५ र रेमिट्यान्समा १२.७५ प्रतिशत ब्याजदर कायम गर्ने निर्णय भएको छ।’
हाल विकास बैंकहरुले मुद्दति निक्षेपमा व्यक्तिगततर्फ अधिकतमा १२ प्रतिशत, संस्थागतर्फ १० र रेमिट्यान्समा १३ प्रतिशत ब्याजदर दिँदै आएका छन्।
वि.सं.२०७९ माघ २७ शुक्रवार १५:५५ मा प्रकाशित
