काठमाडौँ । बैंक तथा वित्तीय संस्थाहरुले दुर्गा प्रसाईं आवद्ध कम्पनीलाई ऋण नथप्ने ‘अनौपचारिक’ निर्णय लिएका छन् । भएकै ऋणसमेत जोखिममा परेको, र बैंक तथा वित्तीय संस्थाहरु विरुद्ध अराजक गतिविधि गरेको निष्कर्षसहित उनले ऋण लिएका बैंकहरुले उनी आवद्ध कुनै पनि कम्पनीलाई ऋण नथप्ने अनौपचारिक निर्णय गरेका हुन्।
‘अव यस्तो कुरा भन्न मिल्ने कुरा होइन । माइन्युट गर्ने कुरा पनि होइन । तर अव प्रसाईंका कम्पनीलाई ऋण नदिने भन्ने मोटामोटी सहमति छ।’ एक बाणिज्य बैंकका सीइओले अर्थ सरोकारसँग भने, ‘हुन त केहि बैंकहरुमा मात्र उहाँको ऋण छ । हाम्रो बैंकमा पनि उहाँका कम्पनीको ऋण छ । अव उहाँ आवद्ध कम्पनीलाई ऋण नथप्ने कुरा छ । र सोहि अनुसार हुन्छ।’
उनका अनुसार प्रसाईंका ऋण भएका बैंकहरुले आन्तरिक रुपमा यस्तो निर्णय लिएका हुन् । ‘यो बैंकर्स संघको निर्णय होइन । हामीले अव नथप्ने भनेर केहि बैंकहरु बीच सल्लाह गरेका हौँ ।’ एक बैंकका सीइओले भने । प्रसाईंको ७ अर्व हाराहारी बैंकको ऋण छ ।
वि.सं.२०७९ फागुन २६ शुक्रवार १२:०७ मा प्रकाशित