काठमाडौं । माई खोला हाइड्रोपावरको आइपीओमा आज बैशाख ८ गते पहिलो दिन २४ लाख ९३ हजार २९० कित्ताका लागि आवेदन परेको छ ।
शुक्रबार साँझसम्ममा २ लाख १८ हजार २९१ जना सर्वसाधारण आवेदकले २४ करोड ९३ लाख २९ हजार रुपैयाँ बराबरको आवेदन दिएका हुन् । यसआधारमा हेर्दा, यसमा पहिलो दिनमै मागभन्दा करिब दोब्बर आवेदन परेको छ ।
कम्पनीले बैशाख ८ गते शुक्रबारदेखि सर्वसाधारणका लागि प्रतिकित्ता १०० रुपैयाँको दरले १२ लाख ६९ हजार ४११ कित्ता सेयर बिक्री खुला गरेको हो ।
कम्पनीले कुल १५ लाख २९ हजार ४११ कित्ता सेयरमध्ये ७६ हजार ४७१ कित्ता म्युचुअल फन्ड र ३० हजार ५८८ कित्ता सेयर कर्मचारीका लागि सुरक्षित गरी बाँकी रहेको सेयर सर्वसाधारणलाई खुला गरेको हो । यसमा न्यूनतम १० कित्तादेखि अधिकतम ५० हजार कित्तासम्म आवेदन दिन सकिनेछ ।
वैशाख १२ गतेसम्म आवेदन दिन सकिनेछ । आयोजना प्रभावित स्थानीय र वैदेशिक रोजगारीमा रहेका नेपालीका लागि यसअघि नै आइपीओ बिक्री गरिसकेको छ ।
वि.सं.२०८० वैशाख ८ शुक्रवार १७:१८ मा प्रकाशित
