काठमाडौं । सहकारी विभागका रजिष्ट्रार नमराज घिमिरेले सहकारीबाट लगेको ऋण तिर्दिन भन्ने छुट कसैलाई नभएको बताएका छन् ।
राष्ट्रिय सहकारी बैंकको सदस्य सम्मान तथा अन्तरक्रिया कार्यक्रममा बोल्दै रजिष्ट्रार घिमिरेले सहकारीको ऋण नतिर्नेहरुलाई कानुनी कारबाही गर्ने बताएका हुन् ।
मुलुकमा कानुन छ, सहकारीबाट ऋण लगेर तिर्दिन भन्ने अराजकतालाई कानुन अनुसार कारबाही हुन्छ । ऋणीको जग्गा तथा हकभोग लाग्ने एकाघरको सम्पत्ति समेत बिक्री गरेर ऋण तिर्ने कानुनी व्यवस्था छ । त्यसैले ऋण नतिर्ने छुट कसैलाई पनि नभएको घिमिरले भने ।
सहकारीमा धितो राखेको वा नराखेको ऋणीको हकभोग लाग्ने एकाघरको सम्पत्ति समेत बिक्री गरेर ऋण तिराउने सहकारी ऐनमा व्यवस्था छ । सहकारीबाट लगेको ऋण नतिरे राज्यले सहजीकरण गरेर ऋण तिर्ने वातावरण बनाउने घिमिरेले बताए ।
सहकारीका नाममा निजी सम्पत्ति जोड्ने, आफु र आफन्तका कम्पनी चलाउने र वित्तीय संकट देखाएर वचतकर्ताहरुको रकम फिर्ता नगर्नेहरुलाई कारबाही गरी वचतकर्ताहरुको रकम फिर्ता गराउनका लागि विभागले प्रक्रिया अगाडि बढाएको राजिष्टार घिमिरेको भनाई छ ।
सहकारी राम्रोसंग चलाउदै गर्दा वित्तीय क्षेत्रको संकटका कारण तरलता समस्या भएका सहकारीहरुले श्वेतपत्र जारी गरेर वचत फिर्ताका लागि समय तोक्न सक्ने व्यवस्था गरिएको छ । सहकारीको रकमबाट निजी सम्पत्ती जोड्न प्रयोग गर्नेहरुलाई कार्वाही गरेर वचतकर्ताको रकम फिर्ता गरिने उनले बताए ।
वि.सं.२०८० असार ६ बुधवार १२:१३ मा प्रकाशित
