काठमाडौं । उपप्रधान एवम गृहमन्त्री नारायणकाजी श्रेष्ठले वाणिज्य र्बैंकका सबै प्रमुख कार्यकारी अधिकृत (सिईओ) लाई व्यक्तिगत रुपमै म्यासेज गरेर डिनर मिटिङका लागि बोलाएका छन् ।
गृहमन्त्री श्रेष्ठले आज साँझ पुल्चोकस्थित निजी निवासमा २१ वटै बाणिज्य बैंकका सीइओहरुलाई रात्रिभोजमा डाकेका हुन् ।
पछिल्लो समय बैंकिङ क्षेत्रमा देखिएको चुनौतिका विषयमा अनौपचारिकरुपमा जानकारी लिने र समस्याको समाधान गर्ने उदेश्यले बैंकरहरुलाई रात्रिभोजमा बोलाइएको उनको निजी सचिवालयले जनाएको छ ।
पछिल्लो सरकारले सुरक्षा दिन नसकेको भन्दै बैंकहरुले सरकारको आलोचना गरिरहेका छन् । उनीहरुले केही दिन अगाडी सरकारले सुरक्षाको प्रत्याभूति नदिए सम्पूर्ण बैंकिंग सेवा बन्द गर्ने चेतावनी समेत दिएका थिए ।
‘बैंक विरुद्धका गतिविधिले बैंकहरुलाई कस्तो असर परेको छ र सरकारले कसरी शान्तिसुरक्षाको प्रत्याभूति गराउन सक्छ लगायतका विषयमा गृहमन्त्रीले छलफल गर्नुपर्यो भन्दै बोलाएका छन्, एक सिईओले भने । मन्त्रालयमा बोलाउँदा छलफल औपचारिक हुने भएकाले गृहमन्त्री श्रेष्ठले अनौपचारिक छलफल गरेर वास्तविकता बुझ्न निजी निवासमा बोलाएको जनाइएको छ ।
बैंक तथा वित्तीय संस्था र सोमा कार्यरत सम्पूर्ण कर्मचारीहरुको प्रभावकारी सुरक्षा प्रबन्ध मिलाउन बैंक तथा वित्तीय संस्था परिसंघले प्रधानमन्त्री, गृह मन्त्री, गृह सचिव, प्रहरी महानिरिक्षक, ७७ वटै जिल्लाका प्रमुख जिल्ला अधिकारीहरुलाई ज्ञापन पत्रसमेत बुझाइसकेका छन् ।
वि.सं.२०८० असार २२ शुक्रवार १५:१९ मा प्रकाशित
