काठमाडौं । खाद्य अधिकार प्रत्याभुति र सुनिश्चितताको लागि पैरवी गर्ने उद्देश्यका साथ स्थापित मानव अधिकारवादी संस्था फियान नेपालको आज सम्पन्न १६ औ साधारण सभा तथा ८ औं अधिवेशनले पुनः गोकर्ण रुपाखेतीलाई सर्वसम्मत अध्यक्ष चयन गर्दै नयाँ कार्यसमिति निर्वाचित गरेको छ ।
कार्यसमितिको उपाध्यक्षमा इन्द्रमाया शंकर, महासचिवमा राम बहादुर पुन, कोषाध्यक्षमा सफल सुब्बा, सचिवमा मदनराज जोशी, सदस्यहरुमा रामलखन हरिजन, बसन्त प्रताप सिंह, प्रकाश बहादुर सिंह र यमुना महर्जन निर्वाचित भएका छन् ।
विहिबार काठमाडौंमा सम्पन्न सोह्रौं साधारसभाको अवसरमा आयोजित नेपाल भारत खुला सिमाले सो क्षेत्रमा बसोबास गर्ने समुदायको मानव अधिकार तथा खाद्य अधिकारमा पारेको असर–प्रभाव विषयक अन्तरक्रियाको आयोजना गरिएको थियो ।
कार्यक्रममा प्रतिनिधिसभाको प्राकृतिक स्रोत साधन समितिकी सदस्य सरस्वती सुब्बाको प्रमुख आतिथ्यतामा सम्पन्न कार्यक्रममा विभिन्न सरोकारवाला निकायहरुको सहभागिता थियो ।
दिगो विकास लक्ष्यको लक्ष्य नं २ को उद्देश्य हासिल गर्नका लागि यस संस्थाले विभिन्न गतिविधिहरु मार्फत योगदान पुर्याउदै आएको छ । २०३० सम्म भोकमरीको समस्या अन्त्य गर्ने सरकारको लक्ष्यलाई सहयोग गर्नका निमिक्त समुदाय तहदेखि राष्ट्रिय स्तरमा वकालत र पैरवी गर्दै आएको छ ।
वि.सं.२०८० कात्तिक २४ शुक्रवार ०८:३७ मा प्रकाशित
