काभ्रेपलाञ्चोक, २२ माघ : पनौती नगरपालिकाबाट आज प्रहरीले ७३ बोरा गाँजासहित तीन जनालाई पक्राउ गरेको छ ।
पनौती-५ आइटी पार्कस्थित पनौती–बनेपा सडकखण्डमा बिहान ८.३० बजे सवारी जाँचका क्रममा प्लास्टिकको विभिन्न आकारका ७३ बोरामा दुई सय ८५ केजी गाँजासहित दुई पुरुष र एक महिलालाई प्रहरीले नियन्त्रणमा लिएको हो । चौकीबाट खटिएको प्रहरी टोलीले सवारी जाँच गर्ने क्रममा पनौतीबाट बनेपातर्फ आउँदै गरेको बा ६ च २९६ नम्बरको डिआई गाडीमा उक्त अप्रशोधित (हालै काटेको जस्तो हरियो) गाँजा ल्याइएको आवस्थामा बरामद गरिएको जिल्ला प्रहरी कार्यालय धुलिखेलले जनाएको छ ।
प्रहरीका अनुसार काभ्रेपलाञ्चोकको दक्षिणी (डाँडापारी) क्षेत्रबाट उक्त परिमाणको गाँजा ल्याइएको प्रारम्भिक अनुसन्धानबाट खुलेको छ । पक्राउ पर्नेमा चालक नुवाकोट विदुर नगरपालिका–११ घर भई हाल काठमाडांँै बालाजु बस्ने ३५ वर्षे बुद्धमान तामाङ, रामेछाप नपा–८ घर भई हाल काठमाडौँ बालाजुमै बस्ने २० वर्षीय सञ्जीव तामाङ र ५३ वर्षीया बिमला तामाङ छन् । उनीलाई इलाका प्रहरी कार्यालय बनेपाको हिरासतमा राखी थप अनुसन्धान भइरहेको प्रहरीले जनाएको छ ।
वि.सं.२०८० माघ २२ सोमवार १४:१४ मा प्रकाशित
