काठमाडौं । सूचना तथा सञ्चार प्रविधि मन्त्री शेरधन राईले नेपाल टेलिकमको सेवाप्रति पछिल्लो समयमा ग्राहकको धेरै गुनासो आएको भन्दै टेलिकम पदाधिकारीहरुसँग सोधपुछ गरेका छन् ।
टेलिकमका प्रबन्ध निर्देशक बुद्धि आचार्य सहितका सम्बद्ध अधिकारीहरुलाई शुक्रवार मन्त्रालयमै बोलाएर टेलिकमको रिचार्ज र नेटवर्कमा आइरहेको खराबीका बारेमा जानकारी लिएका हुन् ।
‘टेलिकमको रिचार्ज कार्डमा निरन्तर समस्या आएको भनेर मलाई पूर्व मुख्य सचिव लगायतका व्यक्तिदेखि सर्वसाधारणबाट समेत गुनासो आइरहेको छ, तत्कालै यसमा सुधार ल्याउनुस्,’ राईले टेलिकम अधिकारीहरुलाई निर्देशन दिँदै भने ।
टेलिकम पदाधिकारीहरुले भने पछिल्लो समयमा रिचार्ज कार्डमा मुख्यतः ५० रुपैयाँको कार्डमा समस्या देखिए पनि तत्कालै सुधार गर्ने प्रक्रिया चलिरहेको दावी गरेका छन् ।
टेलिकमको सेवामा सुधार गर्नका लागि तत्कालिन र दीर्घकालिन योजना बनाउन आफूले निर्देशन दिएको राईले बताए । राईले हालको समस्या तत्कालै समाधान गरेर आफूलाई जानकारी गराउन निर्देशन दिएका छन् ।
वि.सं.२०७२ मंसिर २५ शुक्रवार १८:१६ मा प्रकाशित
