काठमाडौं । मानुषी लघुवित्त वित्तीय संस्थाको सोमबार कारोबार हुन सकेन ।
नेपाल स्टक एक्सचेञ्ज(नेप्से) मा स्पेशल प्रि–ओपन सेसन कारोबारमा म्याच नभएपछि कारोबार हुन नसकेको हो ।
नेप्सेका अनुसार भोलि अर्थात मंगलबार फेरि स्पेशल प्रि–ओपन सेसनमा कम्पनीको कारोबार खुल्नेछ । भोलिको प्रि– ओपन सेसनमा कारोबारमा म्याच भएपछि मात्रै नियमित कारोबार हुनेछ ।
स्पेशल प्रि-ओपन सेसन कारोबारमा म्याच भएपछि मात्र रेगुलर कारोबार खुल्ने प्रावधान छ । कम्पनीको १० लाख ९३ हजार ७५० कित्ता सेयर आइतबार नेप्सेमा सूचीकृत भएको छ ।
संस्थाको आइपीओले प्रतिकित्ता १३२ रुपैयाँ ६९ पैसादेखि ३९८ रुपैयाँ ०७ पैसासम्म ओपनिङ रेञ्ज पाएको छ । यही भित्र रहेर पहिलो कारोबार हुनेछ ।
संस्थाले साउन २७ देखि प्रतिकित्ता १०० रुपैयाँका दरले ३ करोड ९३ लाख ७५ हजार रूपैयाँको ३ लाख ९३ हजार ७ सय ५० कित्ता सेयर निष्कासन गरेको थियो ।
जसमा ५ हजार ४६९ कित्ता कर्मचारी र १९ हजार ६८८ कित्ता सेयर सामूहिक लगानी कोषलाई छुट्याएर ३ लाख ६८ हजार ५९३ कित्ता सेयर सर्वसाधारणलाई छुट्याइएको थियो ।
आईपीओमा २३ लाख ६१ हजार ८ सय २७ जनाको आवेदन परेकोमा ७ हजार ४३ जनाको आवेदन रद्द भएर २३ लाख ५४ हजार ७ सय ८४ जना मात्रै योग्य ठहरिएका थिए ।
जसबाट ३६ हजार ८ सय ५९ जनाले १० कित्ता सेयर पाएका थिए । जसबाट ३ जनाले थप १ कित्तासहित ११ कित्ता सेयर पाएका थिए ।
वि.सं.२०७८ असोज ११ सोमवार १२:१४ मा प्रकाशित
