काठमाडौं । नेपाल राष्ट्र बैंकले ६५ वर्ष उमेर नाघेको व्यक्तिलाई पनि बैंक तथा वित्तीय संस्थाको प्रमुख कार्यकारी अधिकृत (सिइओ) मा नियुक्त हुन सक्ने बाटो खोलेको छ ।
त्यसको लागि भनेको राष्ट्र बैंकले तोकेको शर्त पालना गर्नुपर्ने छ । राष्ट्र बैंकले एकीकृत निर्देशन–२०७७ मा संसोधन तथा परिमार्जन गर्दै यस्तो व्यवस्था गरेको हो ।
राष्ट्र बैंकका अनुसार २०७९ असार मसान्त भित्र गाभ्ने-गाभिने तथा प्राप्ति प्रक्रिया सम्पन्न गरी एकीकृत कारोबार गर्ने गरी दुई वा दुईभन्दा बढी वाणिज्य बैंकहरु एकापसमा गाभ्ने-गाभिने तथा प्राप्ति प्रक्रियामा सहभागी भएमा एक पटकका लागि ६५ वर्ष उमेर नाघेको व्यक्ति बैंक तथा वित्तीय संस्थाको प्रमुख कार्यकारी अधिकृतमा नियुक्त वा पुनः नियुक्त गर्न सकिने व्यवस्था गरेको छ ।
उक्त निर्देशनमा वाणिज्य बैंकहरु एक आपसमा गाभ्ने-गाभिने वा प्राप्ति प्रक्रियामा संलग्न भई २०७९ असार मसान्तभित्र एकीकृत कारोबार संचालन गरेमा यस बैंकबाट तोकिएको न्यूनतम २५ प्रतिशत बराबर ऋणपत्र जारी गर्नु पर्ने समयावधि २०८० असारमसान्त सम्म थप गरिने उल्लेख छ ।
आपसमा गाभ्ने-गाभिने वा प्राप्ति प्रक्रियामा संलग्न भई २०७९ असार मसान्तभित्र एकीकृत कारोबार संचालन गर्ने संस्थाको हकमा एकभन्दा बढी प्रदेशमा समेत शाखा कार्यालय खोली सञ्चालनमा रहेका वित्तीय संस्थाहरुले २०७७ असारभित्र उक्त शाखा विक्री, बन्द वा स्थानान्तरण गरी आफ्नो सम्पूर्ण कार्यक्षेत्र एउटै प्रदेशभित्र सीमित गरी सक्नु पर्ने व्यवस्थाको समयावधि २०८० असारमसान्त कायम गरिएको छ ।
वि.सं.२०७८ असोज २५ सोमवार १६:५४ मा प्रकाशित