काठमाडौं । नेपाल राष्ट्र बैंकका गभर्नर महाप्रसाद अधिकारीले मौद्रिक नीति मार्फत गरिएको सिडि रेसियो (कर्जा निक्षेप अनुपात)का कारण नै वित्तिय क्षेत्र ठूलो समस्याबाट जोखिएको बताएका छन् ।
काठमाडौमा भएको एक कार्यक्रममा बोल्दै गभर्नर अधिकारीले सिडि रेसियोको व्यवस्थाले बैंक तथा वित्तिय संस्थालाई लगाम लगाएकोले उनीहरुले जसरी पनि व्यवसाय बृद्धि गर्ने सोचबाट अगाडी बढ्न नसक्दा गलत दिशामा जानबाट जोगाएर उनीहरुलाई बचाएको दावी गरे ।
उनले भने,‘मुलुकको वित्तीय नीति सिडि रेसियोका कारण सही दिशामा रहन मद्दत पुगेको छ, यसले केही सीमित समूहलाई नकारात्मक प्रभाव परेको हुनसक्छ तर त्यसलाई हेरेर हुन्न, हामीले समग्र अर्थतन्त्रलाई हेर्नुपर्छ ।”
“तरलताको समस्या हामीले हरेक वर्ष कुनै न कुनै किसिमले एउटा सिजनमा भोग्दै आएका छौ।गत वर्ष मात्रै कर्जाको माग कम भएको र रिफाइनान्स प्रशस्त गएको कारण तरलता सहज भएको हो।“ उनले भने । अहिले तरलताको समस्या टार्न राष्ट्र बैंकले अरबौंको तरलता बजारमा पठाएको समेत उनले बताए। यसले सिस्टमलाई र संस्था दुवैलाइ जोगाएको छौ।
भोलि जस्तोसुकै समस्या आए पनि यी सूचकहरुको कारण बचाउन सकिन्छ।कर्जाको ब्याजदर अझै औषतमा ९ प्रतिशतभन्दा कम छ। यो भनेको धेरै ठुलो कुरा हो।“उनले भने । कर्जाको ब्याजदर अझै दोहोरो अंकमा नपुगेकोले आत्तिनुपर्ने अवस्था नआएको उनको भनाई छ।
हरेक वर्ष मंसिर पुसमा बैंकिङ प्रणलीमा तरलताको समस्या देखिने गरेको छ। कर्जाको माग धेरै हुने तर सरकारले समानुपातिक रुपमा बजेट खर्च गर्न नसक्ने कारण यस समयमा तरलता समस्या आउने गर्छ। गत वर्ष भने कारोना महामारीको कारण कर्जाको भाग निकै कम थियो भने बैंकिङ प्रणालीमा निक्षेप संकलन थुप्रिएर बसेको थियो। यसै कारण गत वर्ष बैंकिङ्ग प्रणालीमा अधिक तरलताको अवस्था थियो।
यो वर्ष कर्जाको माग धेरै भएको कारण ब्याजदर केही माथि गएको छ। यसले गर्दा चालु आर्थिक वर्षमा मूल्य बृद्धिमा चाप पर्ने देखिएको समेत गभर्नर अधिकारीले बताए। तर,असोज यता सरकारी खर्च राम्रै भएको समेत उनले बाताए।
वि.सं.२०७८ मंसिर ८ बुधवार १७:४९ मा प्रकाशित
