काठमाडौं । नेपाल पुनर्बीमा कम्पनीले बल्ल गत आर्थिक वर्ष २०७७/७८ को चौथो त्रैमासिक वित्तीय विवरण सार्वजनिक गरेको छ ।
काम्पनीले गत वर्षको असार मसान्तमा निर्जीवन व्यवसायबाट १ अर्ब १ करोड ५१ लाख ६२ हजार रुपैयाँ र जीवन बीमा व्यवसायबाट १५ करोड ४३ लाख ८४ हजार रुपैयाँ खुद नाफा गरेको छ ।
अघिल्लो आवको चौथो त्रैमासको तुलनामा भने निर्जीवन व्यवसायबाट हुने नाफामा झिनो सुधार गरेको हो । अघिल्लो वर्षको सोही अवधिमा कम्पनीले निर्जीवन बीमा व्यवसायबाट १ अर्ब ९९ लाख २० हजार रुपैयाँ नाफा गरेको थियो ।
यस्तै, अघिल्लो वर्षको चौथो त्रैमासको तुलनामा कम्पनीको जीवन बीमा व्यवसयबाट हुने नाफा भने ३२.१८ प्रतिशतले बढेको हो । उक्त अवधिमा कम्पनीको जीवन बीमा तर्फको नाफा ११ करोड ६७ लाख ९१ हजार रुपैयाँ रहेको थियो ।
कम्पनीले गत वर्षको चौथो त्रैमासमा निर्जीवन व्यवसायबाट ८ अर्ब २३ करोड १ लाख ८८ हजार रुपैयाँ र जीवन व्यवसायबाट १ अर्ब २० करोड १ लाख ३२ हजार रुपैयाँ खुद बिमा शुल्क आर्जन गरेको गरेको छ ।
उक्त अवधिमा कम्पनीको कुल बीमाशुल्क आर्जन रकम भने १० अर्ब ५१ करोड ३१ लाख रुपैयाँ र कुल दावी भुक्तानी रकम भने ४ अर्ब ८८ करोड ७० लाख रुपैयाँ रहेको छ । भुक्तानी हुन बाँकी दावी रकम भने ३ अर्ब ५ करोड ८२ लाख रुपैयाँ देखिएको छ ।
कम्पनीको चुक्ता पुँजी १० अर्ब रुपैयाँ रहेको छ । असार मसान्तसम्म यस कम्पनीको निर्जीवन व्यवसायतर्फको जगेडा कोषमा २ अर्ब ७१ करोड २९ लाख १५ हजार रुपैयाँ र जीवन बिमातर्फ ६३ करोड ८५ लाख १६ हजार रुपैयाँ छ । कम्पनीले निजीवन बिमा कोषमा २ अर्ब ४६ करोड ५४ लाख ४० हजार रुपैयाँ राखेको छ ।
उक्त अवधिमा कम्पनीको प्रतिसेयर आम्दानी वार्षिक ११ रुपैयाँ ६९ पैसा र प्रतिसेयर नेटवर्थ १५८ रुपैयाँ १७ पैसा रहेको थियो ।
वि.सं.२०७८ मंसिर १३ सोमवार १२:३७ मा प्रकाशित
