काठमाडौं । चीन सरकारले नेपाललाई अनुदानमा २० वटा विद्युतीय बस दिने भएको छ ।
संघीय मामिला तथा स्थानीय विकास मन्त्रालयमार्फत चीन सरकारले नेपाललाई २० वटा इलेक्ट्रिक बस दिन लागेको महानगरपालिकाका प्रशासन तथा संगठन विकास विभागका प्रमुख ज्ञानेन्द्र कार्कीले जानकारी दिए ।
यी बसहरू व्याट्री चार्ज गरेर चलाउन सकिन्छ ।
ती अत्याधुनिक एवं ठूला इलेक्ट्रिक बसहरु साझा यातायातमार्फत सार्वजनिक सवारीका रुपमा उपत्यकामा प्रयोग हुनेछन् ।
चीनले काठमाडौं महानगरपालिकालाई ती बस हस्तान्तरण गर्ने तय भएको छ ।
सहयोगसम्बन्धी सम्झौतामा हस्ताक्षर गर्न महानगरपालिकाको एक टोली चीन जाने तयारीमा पनि रहेको छ ।
महानगरपालिकाले चीनसँग थप विद्युतीय बस पनि खरिद गर्ने तयारी गरेको छ । किनिएका समेत गरी चीनबाट नेपालले २ दर्जनबढि विद्युतीय बस ल्याउनेछ ।
महानगरपालिकाले प्राप्त विद्युतीय बस साझा यातायातमार्फत सञ्चालन गर्ने तयारी गरेको छ ।
भारतीय नाकाबन्दीपछि इन्धनको अभाव हुँदा नेपालमा विद्युतीय सवारीको आवश्यक्ता महशुस भइरहेका बेला चीनले बसहरु दिन लागेको हो ।
वि.सं.२०७२ पुस १ बुधवार ०६:५६ मा प्रकाशित
