काठमाडौ । सहकारीको सन्दर्भ ब्याजदर बढाउन दवाव दिदै सहकारी अभियानका नेताहरु सहकारी विभागमा धर्ना बसेका छन् । राष्ट्रिय सहकारी महासंघको अगुवाइमा उपत्यकाका सहकारीकर्मीले सहकारी विभाग नयाँ बानेश्वरमा धर्ना दिएका हुन् । तर अभियानले भने यसलाई शक्ति प्रदर्शनको रुपमा लिएको छ ।
सन्दर्भ ब्याजदर निर्धारण समितिको मंगलबार दिउँसो १ बजेदेखि बैठक सुरु भएको छ । सहकारीकर्मीहरुले ११ बजेदेखि विभाग परिसरमा व्याजदर बढाउन माग गर्दै धर्ना दिइरहेका छन् ।
मंगलबार नै सन्दर्भ ब्याजदर निर्धारण नभए महासंघको अगुवाइमा बढाएर ब्याजदर तोक्ने चेतावनी समेत दिएका छन् । लामो समयदेखि सन्दर्भ ब्याजदर समितिको बैठक बसेपनि ब्याजदर हेरफेर हुन सकेको छैन ।
बाणिज्य बैंकहरुले निक्षेपममा नै ११ प्रतिशतभन्दा बढी ब्याज दिन थालेपछि सहकारीकर्मीहरुले सहकारीको सन्दर्भ ब्याजदर बढाउन लबिङ गर्दै आइरहेका हुन् । तर सरकारले यसप्रति वेवास्ता गरेको जिल्ला सहकारी संघ काठामाडौका अध्यक्ष ज्ञावबहादुर तामाङले बताए ।
यसअघि महासंघको अगुवाइमा नेताहरुले भुमिव्यवस्था, सहकारी तथा गरिवी निवारण मन्त्री शशि श्रेष्ठ र अर्थमन्त्री जनार्दन शर्मालाई भेटेर व्याजदर बढाउन माग गरेका थिए । तर उनीहरु यसविषयमा सकारात्मक नभएपछि नेताहरुले मंगलबार विभागमा धर्ना दिएका हुन् । सहकारीको सन्दर्भ ब्याज १४.७५ बाट नबढे सहकारी टिक्न नसक्ने भन्दै कम्तिमा पनि १७ प्रतिशत पुर्याउन महासंघले लबिङ गर्दै आएको छ ।
वि.सं.२०७८ फागुन १० मंगलवार १४:२६ मा प्रकाशित
