काठमाडौं । आदर्श लघुवित्त वित्तीय संस्थाको आईपीओ नेपाल स्टक एक्सचेञ्ज (नेप्से)मा सूचीकृत भएको छ ।
कम्पनीको १०० रुपैयाँ अंकित दरका २ लाख ७ हजार कित्ता सेयर सोमबार नेप्सेमा सूचीकृत भएको हो । कम्पनीको आइपीओ आज ‘एडिबिएल’ सिम्बोलबाट सूचीकृत भएको छ ।
उक्त सेयर अब भोलि अर्थात मंगलबारदेखि नै धितोपत्र दोस्रोबजारमा कारोबारमा आउनेछ । त्यसपश्चात लगानीकर्ताहरुले खरिदबिक्री गर्न पाउनेछन् ।
कम्पनीले पहिलो कारोबारका लागि १२२ रुपैयाँ ८८ पैसादेखि अधिकतम ३६८ रुपैयाँ ६४ पैसासम्म पाउने देखिएको छ । कम्पनीको आर्थिक वर्ष २०७७/७८ को वास्तविक प्रतिसेयर नेटवर्थ १२२ रूपैयाँ ८८ पैसा रहेको छ । यसको आधारमा कम्पनीको आईपीओ उक्त ओपन रेञ्ज पाउने भएको हो । नेप्सेले हरेक कम्पनीको पहिलो कारोबारको लागि वास्तविक नेटवर्थको तीन गुणासम्म ओपनिङ रेञ्ज तोक्ने गर्दछ ।
कम्पनीले गत असार १ गतेदेखि असार ५ गतेसम्म प्रतिकित्ता १०० रूपैयाँ अंकित दरमा ६७ लाख रूपैयाँ बराबरको ६७ हजार कित्ता आईपीओ निष्काशन गरेको हो ।
जसमध्ये १ हजार ३५ कित्ता सेयर कर्मचारीहरुका लागि, ३ हजार ३५० कित्ता सामूहिक लगानी कोषका लागि र ६२ हजार ६१५ कित्ता साधारण सेयर सर्वसाधारणका लागि छुट्याइएको थियो ।
कम्पनीको आईपीओमा अन्तिम दिनसम्म १८ लाख ७ हजार १ सय २४ जना लगानीकर्ताहरूले २ करोड २ लाख ५० हजार ९ सय ८० कित्ताका लागि आवेदन परेको छ । कम्पनीको आईपीओमा मागभन्दा धेरै आवेदन परेकाले गोलाप्रथाद्वारा बाँडफाँड भएको हो ।
गोलाप्रथाद्वारा वितरण गर्दा रितपूर्वक आवेदन दिने ६ हजार २६१ जनाले १० कित्ताका दरले सेयर हात पारेका छन् । यीमध्ये भाग्यमानी ५ जनाले भने थप १/१ कित्ता सेयर प्राप्त गरेका छन् ।
वि.सं.२०७९ साउन २ सोमवार १६:०९ मा प्रकाशित
