काठमाडौं । धौलागिरी लघुवित्त वित्तीय संस्थाको आईपीओमा आवेदन दिने अन्तिम मिति नजिकिएको छ ।
कम्पनीको आईपीओमा आउँदो आइतबार अर्थात साउन २९ गतेसम्म आवेदन दिन सकिने भएको हो ।
कम्पनीले साउन २४ गतेदेखि आईपीओ निष्काशन गरेको छ । कम्पनीले प्रतिसेयर १०० रुपैयाँ अंकित मूल्यका दरले ३ करोड ३१ लाख रुपैयाँ बराबरको ३ लाख ३१ हजार कित्ता आईपीओ निष्काशन तथा बिक्री खुला गरेको हो ।
कम्पनीले कुल ३ लाख ३१ हजार कित्ता सेयरमध्ये ५ हजार १५५ कित्ता कर्मचारीहरुका लागि, १६ हजार ५५० कित्ता सामूहिक लगानी कोषहरुका लागि र बाँकी रहेको ३ लाख ८ हजार २९५ कित्ता सर्वसाधारणका लागि छुट्याएको छ ।
उक्त आईपीओमा माग भन्दा धेरै आवेदन परेकाले अब साउन २९ गते बैंकिङ्ग समयसम्म आवेदन दिन सकिने छ ।
कम्पनीको आईपीओमा लगानीकर्ताले न्यूनतम १० कित्तादेखि १ हजार कित्तासम्मका लागि आवेदन दिन सक्नेछन् ।
आईपीओ निष्काशन तथा बिक्री प्रवन्धकमा सनराइज क्यापिटल लिमिटेड रहेको छ ।
वि.सं.२०७९ साउन २७ शुक्रवार १४:५३ मा प्रकाशित
