काठमाडौ । अमेरिकी दुतावास युवा परिषद्ले भूकम्प प्रतिरोधी घरनिर्माण बारे जानकारी दिने मोबाइल एप्स र वेभसाइट सञ्चालनमा ल्याएको छ । बुधबार राजधानीमा आयोजित एक कार्यक्रमबीच सूचना तथा सञ्चार मन्त्रालयका सचिव दिनेशकुमार थपलियाले मोबाइल एप्स इकन्ट्रक्सन र वेभसाइट इकन्ट्रक्सन डटकम डट ओराजीको शुभारम्भ गरे ।
एप्स र वेभसाईटको शुभारम्भ गर्दै उनले समाज परिवर्तनको सवालमा सञ्चारका साधनको अहम् भूमिका रहने भन्दै पुनःनिर्माण सम्बन्धी मोबाइल एप्स र वेभसाइटले सर्वसाधारणलाई पुनःनिर्माण र भूकम्पप्रतिरोधी घर बनाउन महत्वपूर्ण जानकारी उपलब्ध गराउन सक्ने बताए । भूकम्पपछिको पुननिर्माणको विषयमा समाजको तल्लो तहमा अझै पनि भ्रम रहेको वताउदै उनले सार्वजानिक एप्स र वेभसाईटले यस्ता भ्रमहरुलाइ चिर्न सफल हुने विश्वास व्यक्त गरे । घरमै बसेर मानिसले आफ्नो पुनःनिर्माणको काम गर्नसक्ने गरी तयार पारिएको मोबाइल एप्स र वेभसाइटले समाजको तल्लो तहका सर्वधारणमा सकारात्मक परिवर्तन ल्याउन मद्धत पुर्याउने उनको विश्वास थियो ।
कार्यक्रममा अमेरिकी दुतावासकी प्रवक्ता इनेकि स्टेनहोमले अमेरिकी दुतावासले समाज परिवर्तनको सवालमा विभिन्न काम गरिरहेको भन्दै आगामी दिनमा दुतावासले नेपाल सरकार र युवाहरुसँगको सहकार्यमा काम गर्ने जानकारी गराइन् ।
परिषद्का सदस्य सरोज पौडेलले एप्स र वेभसाइटमा भुकम्पप्रतिरोधी घर निर्माण गर्दा ध्यान दिनुपर्ने कुराहरु वारे विस्तृत जानकारी उपलब्ध हुने बताए । उनका अनुसार माटोको घर, ढुङ्गाको घर र आरसीसी घर निर्माण गर्दा कसरी भूकम्प प्रतिरोधि घर बन्न सक्छन् भन्ने कुरा मोबाइल एप्स र वेभसाइटमा राखिएको छ । यी सामाग्रीहरु माटो, ढुंगा वा सिमेन्टको घर वनाउन चाहनेहरुको लागि महत्वपूर्ण हुने परिषद्को विश्वास रहेको छ ।
यसैगरी मोबाइल एप्स र वेभसाइटमा क्यालकुलेटर पनि राखिएको छ । परिषद्का अनुसार उक्त क्यालकुलेटरमा आफूले बनाउन चाहेको घरको लम्बाइ र चौडाई लेखेपछि घरमा चाहिने इँट्टा, बालुवा सिमेन्ट र रड समेत कति मात्रामा चाहिन्छ र त्यसको अनुमानित मूल्य(हालको बजार मूल्य अनुसार) देखाउने गर्दछ । जसले सर्वसाधारण मानिसहरु ठगिनवाट बच्न सक्ने छन् ।
परिषद्ले निर्माण गरेको मोबाईल एप्स र वेभसाईट घर वनाउन चाहने सर्वसाधारण देखि इन्जिनियर, ठेकेदारका साथै पुननिर्माण र विपद् व्यवस्थापनको वारेमा वुझ्न चाहने सवै मानिसहरुको लागि उपयोगी हुने परिषद्को भनाई रहेको छ ।
प्रकाशित मिति २०७३ भदौ १
वि.सं.२०७३ भदौ १ बुधवार २३:२२ मा प्रकाशित
