काठमाडौं । दिव्यश्वरी हाइड्रोपावर लिमिटेडले सेयर नपरेको पैसा भदौ १३ गतेदेखि फिर्ता दिने भएको छ । दिव्यश्वरीको आइपीओ बुधबार बाडफाँड गरिएको हो ।
कम्पनीले बिहीबार दिएको जानकारी अनुसार सेयर बाँडफाँड पत्र तथा सेयर नपरेको रकम फिर्ता भदौ १३ सोमबारदेखि आवेदन फारम बुझाएकै केन्द्रबाट गरिनेछ ।आवेदकले सेयर बाँडफाँड पत्र र भुक्तानी पूर्जा लिन जाँदा दरखास्त फारमको अर्धकट्टी र नागरिकताको प्रमाणपत्रको प्रतिलिपि पेस गर्नुपर्नेछ ।
आवेदक आफैं उपस्थित हुन नसकेको खण्डमा बाँडफाँड पत्र र भुक्तानी पूर्जा लिन जाने व्यक्तिलाई मन्जुरीनामा दिनुपर्नेछ ।आवेदक र मन्जुरीनामा पाउने दुवै व्यक्तिको नागरिकताको प्रमाणपत्र प्रतिलिपि पनि अनिवार्य पेस गर्नुपर्नेछ ।
दिव्यश्वरी हाइड्रोपावरले एक सय रूपैयाँ अंकित मूल्यको तीन लाख ९६ हजार कित्ता साधारण सेयर बिक्री गरेको हो ।यो सेयर ३५ हजार दुई सय ८४ जनाले पाएका छन् । अधिकतम पाउनेको हातमा ११ कित्ता सेयर परेको छ । न्यूनतम चिठ्ठा प्रणालीबाट १० कित्ता दिइएको छ ।
प्रकाशितः २०७३ भदौ ९
वि.सं.२०७३ भदौ ९ बिहीवार १५:५२ मा प्रकाशित