काठमाडौँ, २३ भदौ । नेपाली काँग्रेसको राजनीतिक विचारधाराप्रति आस्था राख्ने दुई वटा पर्यटन व्यवसायी संस्थाबीच आज एकीकरण भएको छ ।
राष्ट्रिय पर्यटन व्यवसायी सङ्घ नेपाल(निट नेपाल) र नेपाल लोकतान्त्रिक पर्यटन व्यवसायी सङ्घबीच एकीकरण भई नेपाल पर्यटन व्यवसायी सङ्घ नेपाल(निट) बनेको हो ।
यहाँ आज आयोजित एकता घोषणा समारोहमा निट नेपालका अध्यक्ष दीपक महत र नेपाल लोकतान्त्रिक पर्यटन व्यवसायी सङ्घका अध्यक्ष रामशरण थपलियाले एकीकरणको घोषणा गरे । एकीकरणपछि निटका अध्यक्षमा महत र सहअध्यक्षमा थपलिया रहेका छन् भने अन्य पदाधिकारी र सदस्यको मनोनयन छिटै गरिने सो अवसरमा जानकारी दिइयो ।
छ महिनाभित्र विधान पारित गरी नयाँ बन्ने कार्यसमितिमा सात प्रदेशबाट प्रतिनिधित्व हुने गरी ५१ सदस्यीय हुने अध्यक्ष महतले बताए । एउटै विचारधारा राख्ने व्यवसायीबीच विभाजन हुँदा पर्यटनका विभिन्न व्यावसायिक निकायको निर्वाचनमा पराजय भोग्नुपरेको र व्यवसाय विकासमा अनेक समस्या झेल्नुपरेकाले एकीकरण गर्नुपरेको उनको भनाइ थियो ।
सहअध्यक्ष थपलियाले लोकतान्त्रिक मूल्य मान्यतालाई स्थापित गर्न एकताको विकल्प नभएको बताए ।
वि.सं.२०७३ भदौ २३ बिहीवार २०:५४ मा प्रकाशित
