काठमाडौ । अक्वा निर्मल क्वालिटि ड्रिंकिङ् वाटरमा देखिएको फोहोरको विरोध गर्दा आफूलाई प्रहरी खोरमा थुनिएको पीडित शंकर रोका बादलले आरोप लगाएका छन् । बिहीबार पत्रकार सम्मेलनमार्फत उनले भने, ‘मैले खानेपानीका लागि शिल नखोलेको जार किन्दा शिलप्याक अवस्थामै फोहोरको डल्ला भेटेर कम्प्लेन गर्दा पानी कम्पनीका मालिकहरुले दुव्र्यवहार गरे ।’
रोकाका अनुसार उक्त घट्ना भदौ ६ गतेको हो । उनका अनुसार सुरुमा यसबारेमा कम्प्लेन गर्दा कम्पनीका प्रोप्राईटर द्धय अच्यूत लामिछाने र किशोर मानन्धरले आफूलाई कम्प्लेन गरेर राम्रो काम गरेको भन्दै प्रशंसा गरेका थिए । पीडित रोकाले अघि थपे,‘तर उनीहरुले मलाई गौशालाको पिंगलास्थानमा बोलाएर फोहोर जार जबरजस्ती लान खोजे, म एक्लै गएको थिईंन, मिडियाका साथीहरुपनि सँगै लिएर गएको थिएँ ।’
रोकाले भोलिपल्ट पत्रकार सम्मेलन गर्ने योजना बनाएको तर त्यही दिन नै उनलाई फिल्मी शैलीमा सिभिलमा आएका प्रहरीले भ्यानमा हालेर आफुलाई प्रहरी परिसर टेकुमा लगेको बताए । उनले भने,‘मलाई अपहरण शैलीमा प्राईभेट भ्यानमा हालेर लगियो, मेरो साथमा रहेको मोवाईल, सिक्रि र घडी समेत लुटिएको छ ।’
उनले १६ दिनसम्म आफूलाई हिरातमा राखिएको बताए । रोकाले भने,‘ म भदौ २१ गते मात्रै १५ हजार धरौटिमा छुटेको छु ।’
रोकालाई अहिले सार्वजनिक अपराधको मुद्दामा तारेखमा छोडिएको छ ।
प्रकाशित मितिः २०७३ असोज १३
वि.सं.२०७३ असोज १३ बिहीवार १८:११ मा प्रकाशित
