काठमाण्डौं । साढे दुई दशकभन्दा बढी अवधिदेखि पर्यटन व्यवसायमा संलग्न व्यवसायीहरुले स्थापना गरेको अल्टिच्यूड एयरले दशैंको फूलपाति पारेर भोलिदेखि नै व्यवसायिक हेलिकोप्टर सेवा सञ्चालन गर्ने भएको छ ।
यसका लागि कम्पनीले दुई साताअघि नै एयरबस कम्पनीले निर्माण गरेको एस–३५० बी ३ ई नामको ६ सिटे हेलिकप्टर नेपाल ल्याइसकेको छ । अर्को हेलिकप्टर फागुनमा र त्यसको ६ महिनाभित्र थप दुई हेलिकप्टर ल्याएर सेवा दिने तयारी गरिरहेको कम्पनीका प्रवन्ध निर्देशक निमानुरु शेर्पाले जानकारी दिए ।
हाई अल्टिच्युड उद्धार, पर्यटकीय स्थल अवलोकन, माउन्टेन फ्लाइट, विकास र पूर्वाधारका लागि सेवा दिने कम्पनीले लक्ष्य छ । अहिले भइरहेको हेलिकप्टर कम्पनीसँग आफ्नो स्वस्थ प्रतिस्पर्धा हुने र आफूहरूले गुणस्तर र सुरक्षामा बढी ध्यान दिने उनले बताए ।
६ यात्रु र एकजना पाइलट बस्न मिल्ने सिट रहेको यो हेलिकप्टर २६ करोड रुपैयाँमा खरिद गरिएको कम्पनीले जनाएको छ । कम्पनीले १ अर्ब रुपैयाँभन्दा बढी लगानी गर्ने तयारी गरेको छ । सिंगल इन्जिन रहेको हेलिकप्टरले उच्च क्षमता दिने कम्पनीको भनाइ छ । यही मोडलको हेलिकप्टरले २००५ मे १४ मा सगरमाथामा ल्यान्ड गरेर विश्व रेकर्ड राखेको थियो ।
२१ असोज २०७३, १।००
वि.सं.२०७३ असोज २१ शुक्रवार १५:०७ मा प्रकाशित
