एकदिन एउटा मानिस बाटो काटिरहेको थियो । त्यही बेला उसले देख्यो कि ठूला ठूला हात्तीहरु मसिना र कमजोर देखिने डोरीहरुले बाँधिएका थिए । उसलाई अचम्म लाग्यो । किनभने ती डोरीहरु यति कमजोर थिए कि हात्तीहरुले सजिलै आफ्नो बलले त्यसलाई फुत्काएर आफूले चाहेको स्थानतिर भाग्न सक्थे । तर ती हात्तीहरु त्यही डोरीमा बाँधिएर बसेका थिए ।
त्यो व्यक्तिलाई यो कुराले यति अचम्म लाग्यो कि ऊ त्यो हात्तीहरुको माउते भएको ठाउँमा गएर यस विषयमा जान्ने विचार ग¥यो । त्यसपछि ऊ हात्तीका माउतेको छेउमा गयो र किन हात्तीलाई मसिनो डोरीले बाँधेको अनि यस्तो अवस्थामा हात्तीहरु किन नभागेको भन्ने प्रश्न राख्यो । त्यो माउतेले जवाफ दियो कि हात्तीहरु जब साना थिए त्यतिबेला देखि नै उनीहरुलाई त्यही डोरीले बाँध्ने गरिएको थियो ।
सानो उमेरमा हात्तीहरुलाई त्यही डोरीले बाँधिएको थियो । त्यो समयमा उनीहरुले त्यो बन्धनलाई फुत्काउने भरपुर प्रयास गरे । तर उमेर सानो र बल कम भएकाले त्यतिबेला उनीहरुले त्यो डोरी फुत्काउन सकेनन् । अहिले उनीहरु ठूला भए, उनीहरुसँग त्यो डोरी फुत्काउने भन्दा पनि सयौं गुणा बढी बल छ तर पनि उनीहरु त्यो डोरी फुत्काउँदैनन् किनकी उनीहरुको दिमागमा नै अहिले पनि यो डोरी बलियो छ भन्ने भ्रम बसिरहेकोछ । उनीहरुलाई अझै पनि उनीहरुले त्यो डोरी फुत्काएर भाग्न सक्दैनन् भन्ने मानसिकता रहेकाले उनीहरुले त्यो झिनो डोरीकै आडमा बाँधिएर बसेको जवाफ त्यो माउतेले ती व्यक्तिलाई दिए ।
त्यी व्यक्ति यो कुरा सुनेर छक्क परे । हामी मानिसहरुको जीवनमा पनि यही कुरा लागु हुन्छ । हामी मानिसहरुले कहिलेकाँही असफलतालाई नै आफ्नो भाग्य मान्न थाल्छौं । केही सफयको प्रयासपछि हामी फेरि प्रयास गर्न छाड्छौं । केही समयको असफलता पछि हामीलाई लाग्न थाल्छ कि हामी गलत इच्छा वा चाहना राख्न थालेका छौं, त्यो कुरा हाम्रो लागि बनेको नै हैन भन्ने सोच्न थाल्छौं ।
यस्तो कदापी हुँदै होइन । असफलता भनेको त एउटा खुड्किलो हो । र हामी मानिसहरुसँग आफ्नो हरेक डरलाई जित्ने क्षमता रहेको हुन्छ । त्यस्तै हामीसँग आफ्नो असफलतासँग जुध्ने शक्ति पनि रहेको हुन्छ, मात्र हामी त्यसलाई देखेर पनि नदेखे जस्तो गरिरहन्छौं ।
यो लेखबाट सिक्न सकिने तीनवटा कुराहरु :
१. केही असफलताहरुले यो कहिल्यै पनि ग्यरेन्टी गर्दैनन् कि हामी जिन्दगीमा असफल भएका छौं ।
२. हामीले सधैं प्रयासरत हुनु जरुरी छ किनभने हरेक पटकको प्रयाससँगै हामी बलियो हुँदै गइरहेका हुन्छौं ।
३. हामीले आफ्नो सोचाईलाई असफलताप्रति केन्द्रित गर्नु हुन्न र मेरो भाग्यमै रैनछ भन्ने सोच्नुहुन्न, हामीले मात्र प्रयास गर्न छाड्न हुन्न ।
वि.सं.२०७३ असोज २९ शनिवार ०९:०७ मा प्रकाशित
