काठमाण्डौं । नेपाल एसबिआई बैंकले दश बराबर चार अर्थात चालीस प्रतिशत हकप्रद बिक्री गर्ने निर्णय गरेको छ । साथै बैंकले संस्थापक सेयरधनी र साधारण सेयरधनीको स्वामित्व ७०ः ३० कायम गर्न ६७ हजार ७ सय ६७ कित्ता एफपिओ जारी गर्देछ ।
बैंकले यसअघि प्रस्ताव गरेको बोनस तथा एफपिओको बिक्रीपछि कायम पूँजीको ४० प्रतिशत हकप्रद बिक्री गर्ने निर्णय गरेको हो । बैंकले एक अर्ब ९९ करोड १९ लाख रुपैयाँ बराबरको हकप्रद बिक्री गर्ने निर्णय गरेको छ ।
३ अर्ब ८८ करोड ३७ लाख रुपैयाँ चुक्तापूँजी रहेको बैंकले गत आर्थिक बर्षको मुनाफाबाट २८ प्रतिशत वोनस सेयर र कर प्रयोजनका लागि १।५३ प्रतिशत नगद लाभांस दिने प्रस्ताव गरेको छ । २८ प्रतिशत बोनस वितरण पश्चात बैंकको पूँजी ४ अर्ब ९७ करोड ११ लाख रुपैयाँको हाराहारीमा पुग्नेछ ।
एफपिओको हकमा, बैंकले एक सय रुपैयाँ अंकित मूल्यमा ८८४ रुपैयाँ प्रिमियम थपेर प्रतिकित्ता ९८४ रुपैयाँमा एफपिओ जारी गर्ने प्रस्ताव धितोपत्र बोर्डमा लगेको छ । बैंकले प्रस्ताव गरेको बोनस एफपिओ र हकप्रद जारी गरेपश्चात बैंकको चुक्तापूँजी ६ अर्ब ९६ करोड रुपैयाँ पुग्नेछ ।
१४ मंसिर २०७३, ११।००
वि.सं.२०७३ मंसिर १४ मंगलवार ११:२८ मा प्रकाशित
